Díli, 29 Marsu 2022 – II Vise-Prezidente Konsellu Ezekutivu Institutu Nasionál Siênsia no Teknolojia (INCT, sigla iha Português) Dr. Augusto Soares, hamutuk ho Xefe Departamentu Siênsia Ezata no Siênsia Naturais INCT, dr. Gregorio Rangel halo distribuisaun rezultadu investigasaun sientífika INCT, relativu ba tinan fiskal 2021 nian no asina Memorandu Entendimentu ho Autoridade Munisipiu Bobonaro, iha salaun administrasaun Munisipiu nian.
Distribuisaun rezultadu investigasaun sientífika INCT ho objetivo atu dissemina informasaun sientífika sira atu ida ne’e sai hanesan referênsia ida ba autoridade lokal sira no sosiedade sivil ba dezenvolvimentu ida ne’ebé di’ak ba sira nia polítika públika. Enkontru permite atu rekolla informasaun foun sira hodi elabora projetu estudu foun ba iha futuru, fahe liña investigasaun INCT nia iha nível munisípiu no lori siênsia, teknolojia no inovasaun ba komunidade sira.
II Vise Presidente Konsellu Ezekutivu INCT, Dr. Augusto Soares, iha ninia intervensaun informa katak, iha tinan 2021, Institutu rekruta Dosente Investigador sira hosi Universidade Públiku no Privada sira hodi realiza investigasaun sientífika sanulu resin neen (16). Iha sentidu ida ne’e, investigasaun ne’ebé hala’o iha Munisípiu Bobonaro tenke aprezenta ba lideransa munisipiu sira.
Relativamente ho akordu ne’ebé asina entre INCT ho Autoridade Munisipiu Bobonaru ne’e ho intuitu ida ida atu autoridade lokál sira identifika rasik área prioritária investigasaun iha futuru b munisipiu ida ne’e.
Reprezentante Sekretáriu Autoridade Munisipiu Bobonaro, Diretora Servisu Munisipal NGOs no Assunto Komunitaria apresia ho inisitaiva INCT nian, nomós distribuisaun rezultadu investigasaun iha área prioritária sira iha Bobonaro hanesan agrikultura, turizmu no seluk tan.
Atividade ne’e hetan partisipasaun hosi Sekretáriu Autoridade Munisipiu Bobonaro, Ponto Fokal, Administrador Postu Administrativu, Xefe Suku, Komandante Polísia Nasionál Timor-Leste (PNTL), Dosente hosi Institute of Business (IOB) Maliana, Funsionáriu Administrasaun Munisipiu Bobonaro, Diretor liña Ministeriál sira, Ajénsia Lokál no Komunidade sira.