Díli, 24 Marsu 2022 – Xefe Departamentu Teknolojia no Inovasaun Institutu Nasional Siênsia no Teknolojia (INCT, sigla iha Português), Sra. Jesuina Inês do R. De Sousa halo aprezentasaun iha seminariu ne’ebé realiza hosi Ministériu Ensinu Superior, Siênsia no Kultura (MESSK) kona-ba “Protesaun no Jestaun Dadus Pesoal” iha Hotel Timor, Kolmera.
Objetivu husi seminariu ne’e atu aprezenta implementasaun lei kona-ba protesaun dadus pesoal no disemina koñesimentu planu jestaun ka organizasaun baze dadus no implementasaun lei kona-ba protesaun dadus pesoal. Iha aprezentasaun, Xefe Departamentu Teknolojia no Inovasaun ko’alia liu kona-ba protesaun dadus pesoal no direitu autor tenke salvaguarda liu-hosi utilizasaun teknolojia foun. Xefe Departamentu ne’e mos ko’alia kona-ba importansia sitasaun autor no obra iha traballu sientífiku no akadémiku sira atu evita plajiu akadémiku, hanesan uzu teknolojia atu rekolla dadus hanesan artigu sientífiku hodi kria “Repozitóriu Dijital Nasionál” Timor-Leste.
Partisipa iha seminariu ne’e Diretor Ezekutivu TIC TIMOR I,P, Dr. Roberto Caitano de Sousa Vicente, Diretor Nasionál Polísia Sientífíku Investigasaun Kriminal (PCIC, sigla iha Português), Sr. Vicente Fernandes Brito, Diretor Nasionál Estatístika, Sr. Silvino Lopes, Asesor Internasionál Ensinu Superior MESSK, Dr. Antonio Correia da Silva no funsionáriu hosi Instituisaun direta no indireta ne’ebé tutela ba Ministériu.