Díli, 1 Marsu 2022 – Institutu Nasionál Siênsia no Teknolojia (INCT, sigla iha Português) hala’o sorumutu entre dirijente no estrutura INCT. Reuniaun ne’e prezide hosi Prezidente Konsellu Ezekutivu INCT, Dr. José Cornélio Guterres, iha sala enkontru INCT, Balide.
Objetivu hosi enkontru ne’e hodi aprezenta rezultadu peskiza sientífika “suisída” – estratéjia prevensaun no redusaun ba nível suisída iha Timor-Leste hosi xefe Departamentu Siênsia Sosiais no Umana, Dr. Leonel da Costa Xavier.
Presidente Konsellu Ezekutivu INCT, Dr. José Cornélio Guterres, iha ninia intervensaun hatete, iha kolesaun dadus ba peskiza suisida ne’e la fasil, tamba iha prespetiva kultural, ita Timor oan balun ladun hakarak fó hatene sira nia problema ba iha públiku. Maibe ekipa INCT konsege levanta dadus no fator sira ligadu ho tema sentral peskiza nian.
Partisipa iha enkontru I no II Vise-Prezidente Konsellu Ezekutivu INCT, Dr. Valentim Ximenes no Dr. Augusto Soares, Sekretária Ezekutiva INCT, Dra. Maria Elsa Diogo Correia, Xefe Departamentu, Xefe Divizaun no funsionáriu INCT rasik.