Díli, 22 Fevereiru 2022 – Reprezentante Sua Excia. Ministru Ensinu Superiór, Siénsia no Kultura (MESSK), I Vise-Prezidente Konsellu Ezekutivu INCT, Dr. Valentim Ximenes partisipa iha Seminariu Lansamentu Website ba Komisaun Nasionál Timor-Leste ba UNESCO (KNTLU) no Palestra Anu Letivu 2022 ba estudante Komunikasaun Sosiál Universidade Nasionál Timor Lorosa’e (UNTL). Serimónia ne’e hala’o iha salaun Katedral, Vila-Verde.
Sekretáriu Ezekutivu Interinu Komisaun Nasionál Timor-Leste ba UNESCO, Sr. Francisco Barreto profere nia diskursu no fó benvindu ba konvidadu sira, afirma katak, ho kontribuisaun tomak husi TIC-Timor ohin loron bele lansa ona website KNTLU hanesan meiu hodi disemina informasaun, inklui, pur ejemplu, kona-ba programa KNTLU nian.
Reprezentante Diretor Ezekutivu TIC-Timor, Diretor Infraestrutura TIC-Timor, Sr. Andre Felix Marques hatete, ho lansamentu ida ne’e nian no Palestra Anu Letivu 2022 ba estudante Komunikasaun Sosiál UNTL bele alkansa objetivu manorin nain sira nian liu-hosi liña eletróniku hanesan komunikasaun hodi responde ba situasaun atuál iha tempu pandemia.
Iha sorin seluk, Dr. Valentim Ximenes, ne’ebé reprezenta Ministru Ensinu Superior Siênsia no Kultura (MESSK), afirma, iha ninia diskursu katak, la’os pur akazu imprensa koñesida iha literatura polítika, hanesan poder dahaat, espresaun ida ne’ebé laiha valor jurídiku, maibé espresaun ne’ebé buka atu tradus oitoan influênsia hosi meiu komunikasaun sosiál ba iha vida polítika koletiva. Imprensa livre sai nu’udar baze ba demokrasia. Ho nune’e, hodi S. Excia. nia naran felisita estudante sira ne’ebé hili ona kareira ne’ebé relevante ba ita nia sosiedade.
Partisipa iha serimónia ne’e, Magnífiku Reitor UNTL, Dr. João Soares Martins, Dr. Aaron Kearney OAM, perito iha área jornalizmu, Xefe Departamentu Komunikasaun Sosiál no Estudante sira hosi kursu Komunikasaun Sosial UNTL.