Díli, 15 Dezembru 2021 – Presidente Konsellu Ezekutivu Institutu Nasionál Siênsia no Teknolojia (INCT, sigla iha Português), Dr. José Cornélio Guterres no Estrutura INCT, partisipa iha Enseramentu Loron Nasionál Ensinu Superior no Loron Mundial Siênsia ba Paz no Dezenvolvimentu, iha Salaun Ian Martin, Balide.
Sua Excelensia Ministru Ensinu Superior, Siênsia no Kultura (MESSK) Dr. Longuinhos dos Santos, iha ninia intervensaun, hato’o agradesimentu wa’in ba Organizador Eventu, Diresaun-Jerál Ensinu Superiór no Siénsia, Institutu Nasionál Siénsia no Teknolojia (INCT), Fundu Dezenvolvimentu Kapitál Umanu (FDCH) no Komisaun Nasionál UNESCO Timor-Leste nian.
Ministru Ensinu Superior, Siênsia no Kultura (MESSK) konsidera lansamentu Boletim INCT no lansamentu konkursu ba Investigador ne’e hanesan pasu Importante ba investigasaun sientífika INCT nian. Governu nia intensaun mak atu dezenvolve modelu ekosistema siénsia, teknolojia no inovasaun ida ba país, no liu hosi modelu ne’e, define kna’ar INCT hosi Universidade, Institutu no Atór sira seluk tan. Nomós pretende atu elabora no aprova ajenda nasionál investigasaun nian, no estabelese klaru liután prioridade no roteiru ba ninia implementasaun.
Portantu, iha Seremonia ne’e INCT halo lansamentu ba livru ho titulu “Padraun Étika Peskiza ba INCT-Timor-Leste”, Boletin INCT, Relatóriu Anual INCT 2021 no Livru Teknolojia Aplikada ba Dezenvolvimentu Sosio-Ekonomiku iha Timor-Leste.
Partisipa iha serimónia ne’e Sekretariu Estadu Arte no Kultura, Sr. Teofilio Caldas, Prezidente Konsellu Ezekutivu INCT, Dr. José Cornelio Guterres, Diretur Ezekutivu ANAAA, Dr. Edmundo Viegas, Diretora Jerál MESSK, Dra. Maria Filomena Lay Guterres, Sekretariu Ezekutivu Komisaun Nasional Timor-Leste ba UNESCO, Sr. Francisco Barreto, Diretor Jeral Arte no Kultura, Sr. Manuel Ximenes Smith no Retor universidade privada no públiku.