Díli, 26 Novembru 2021 – Institutu Nasionál Siênsia no Teknolojia (INCT, sigla iha Português) realiza enkontru Konsellu Fiskal ba dahuluk ne’ebé prezide husi Prezidente Konsellu Ezekutivu Dr. José Cornélio Guterres, iha sala reuniaun INCT, Balide.
Objetivu hosi enkontru ne’e hodi aprezenta membru foun ne’ebé integra iha Konsellu Fiskal: Dr. Isidoro Viana da Costa, Dr. António Freitas no Dra. Cecília de Asis. Iha reuniaun ne’e, Dra. Cecília de Asis hetan votu unaminidade no nomea hanesan Prezidenti Konsellu Fiskal ba instituisaun. Iha enkontru ne’e halo mos aprezentasaun no apresiasaun rejimentu internu Konsellu Fiskal no Prezidenti Konsellu Ezekutivu relata pontu situasaun servisu INCT nian.
Iha reuniaun ne’e Prezidente Konsellu Ezekutivu INCT, Dr. José Cornélio Guterres informa katak institutu iha orgaun governativa haat hanesan; Konsellu Jerál, ne’ebé mak lidera husi Sua Exmo. Ministru Ensinu Superior, Siênsia no Kultura (MESSK) Timor-Leste, Dr. Longuinhos dos Santos; Konsellu Ezekutivu, ne’ebé konstitui hosi Presidente Konsellu Ezekutivu INCT, Vise nain rua (2) Sekretaria Ezekutiva; Konsellu Sientifiku, prezide hosi Dra. Ana Isabel no Konsellu Fiskal, ho membru foun ne’ebé foin anunsia.
Partisipa iha enkontru ne’e dirijentis husi INCT, membru foun ne’ebé integra iha Konsellu Fiskal no Tékniku sira hosi INCT.