Díli, 25 Novembru 2021 – Institutu Nasionál Siênsia no Teknolojia (INCT, sigla iha Português), hamutuk ho Sua Eselénsia, Ministru Ensinu Superior, Siênsia no Kultura (MESSK), realiza Reuniaun Konsellu Jerál ba Dalima, iha instalasaun MESSK Timor-Leste.
Objetivu hosi enkontru ne’e hodi aprezenta rezultadu ezekusaun atividade no orsamentu INCT nian ba tinan fiskal 2021, nomós aprezenta membru foun ne’ebé sei integra iha Konsellu Jerál.
Primeiru Vise-Prezidenti Konsellu Ezekutivu INCT, Dr. Valentim Ximenes, halo aprezentasaun kona-ba ezekusaun atividade ne’ebé realiza ona, simultaneamente, aprezenta proposta atividade ba tinan 2022. Segundu Vise-Prezidente Konsellu Ezekutivu INCT, Dr. Augusto Soares, aprezenta ezekusaun orsamentu fiskal tinan 2021, rejista balansu ezekusaun total 79,6%, ho previzaun ezekusaun ba final tinan 2021 ho orden 90%.
Prezidente Konsellun Jerál INCT, Sua Eselénsia Ministru Ensinu Superior, Siênsia no Kultura (MESSK), Dr. Longuinhos dos Santos, iha nia intervensaun apresia no agradese aprezentasaun hosi Primeiru no Segundu Vise-Prezidente Konsellu Ezekutivu INCT, apela katak, iha futuru, tenke aperfeisoa referênsia, tanba liu hosi ne’eba bele hadia programa, no kada programa tenke iha sub-programa ho identifikasaun responsável, ho forma atu garantia kapasidade ezekusaun, tantu ba programa no orsamentu.
Iha reuniaun, Prezidente Konsellu Ezekutivu INCT, Dr. José Cornélio Guterres aprezenta membru foun ne’ebé sei integra iha Konsellu Jerál: Dr. Valentim Ximenes, Primeiru Vise-Prezidente Konsellu Ezekutivu INCT no Dr. Leonel da Costa Xavier, hanesan Xefe Departamentu Siênsia Sosiais INCT.
Marka prezensa iha enkontru ne’e Dr. Acácio Cardoso Amaral, Pe. Agostinho de Jesus Soares, SDB, Dr. Álvaro Menezes Amaral, Dr. João de Carvalho Fernandes, Dr. Vicente de Paulo Correia no tékniku INCT no MESSK sira.