Dili, 25 Outubru 2021 – Institutu Nasionál Siênsia no Teknolojia (INCT, sigla iha Português) realiza Semináriu Preliminar Peskiza Sientífika ho tema “Promove Koñesimentu Sientífiku no Teknolójiku iha Timor-Leste”, iha Salaun Ian Martin, Balide-Díli.
Hanesan naran ne’ebé indika ona, objetivu principal husi semináriu ne’e atu investigador sira hetan apresiasaun husi júri sir aba sira ninia peskiza. Traballu investigasaun sanulu resin neen (16) hanesan koñesimentu fundamental ba sosiedade, iha àrea sira hanesan (Agrikultura, Ekonomia, Edukasaun no Sosiais) hanesan alvu hodi halo analize, rekomendasaun no preliminar.
Prezidenti Konsellu Ezekutivu INCT, Dr. José Cornélio Guterres, iha ninia intervensaun hatete “INCT nia misaun atu promove siênsia no teknolójia liu husi estimula peskiza sientífika, nune’e rezultadu husi peskiza ne’e bele utiliza hanesan referênsia sientifika no akadémiku ba professor no estudante sira nomós bele oferese ba ita nia nai ulun sira hodi formula sira ninia polítika”.
Antes ne’e, INCT loke konkursu peskiza sientífiku iha área sira hanesan Agrikultura, Ekonomia, Edukasaun no Sosiais. Hafoin halo avaliasaun ba proposta ho projetu investigasaun sira, peskiza 16 mak liu (pasa). Kada proposta peskiza, INCT finansia ho montante orsamentu $ 5.000.
Painel júri sira kompostu husi: Dr. Augusto da C. Soares, João Mariano Saldanha, Ph.D, Dr. Nilton Diamentino Paiva Mau, Aurelio Guterres, Ph.D, José Cornélio Guterres, Ph.D, Dr. Cancio Soares, Leonel da Costa Xavier, Ph.D, Edmundo Viegas, Ph.D, Dr. Acancio Cardoso Amaral, Eduardo Serrão, Ph.D, Dr. Valentim Ximenes, Dr. Rosalino Gomes no Dra. Therese N. N. T. P. Tam. Partisipa iha semináriu ne’e mak entidade relevante, liña ministerial, Reitor sira, professor sira, estudante sira, reprezentante NGO sira no seluk tan.