Díli, 12 Outubru 2021 – Dra. Maria Filomena Lay, atual Diretora Jeral Ministériu Ensinu Superior Siênsia no Kultutra, Reprezentante Sua Eselénsia Ministru Ensinu Superior Siênsia no Kultura (MESSK) hamutuk ho Prezidenti Konsellu Ezekutivu INCT, Dr. José Cornélio Guterres ofisialmente hala’o lansamentu virtual ba Estudu Viabilidade Repozitoriu Digital Institutu Nasionál Siênsia no Teknolojia (INCT) nian iha Instalasaun INCT, Balide.
Objetivu husi estudu ne’e atu halo planu viabilidade ba kriasaun repozitoriu sientífiku Nasionál (disponivel ba País) ba Institutu Nasionál Siênsia no Teknolojia no programa espesifiku Science Technology Innovation (STI).
Diretora Jeral Ministériu Ensinu Superior Siênsia no Kultura, Dra. Maria Filomena Lay iha entrevista hatete “repozitoriu dijital ne’e buat ida ne’ebé importante liu ba estudante, joven investigador no komunidade akadémika sientífika sira ho forma atu konsulta informasaun; no ha’u hanoin importante liu ba ita nia rai, atu nune’e akadémiku sira bele asesu futuramente iha área investigasaun sientífika hotu-hotu”.
Segundu Prezidenti Konsellu Ezekutivu INCT, Dr. José Cornélio Guterres afirma katak “ohin ne’e ita halo lansamentu ofisial Estudu Viabilidade konaba projetu 2 (rua). Ida mak hala’o estudu konaba Repozitoriu Dijital no ida seluk mak programa Science Technology Innovation (STI)”. Antes ne’e INCT hato’o ona proposta ba Uniaun Europeia hodi disponibiliza peritu sira husi nasaun tolu (3) (Canada, Portugal Holanda) atu hamutuk ho Timor-Leste. Ho forma ida n’e, liu husi kooperasaun ho INCT, Science Technology Innovation (STI), National Authority Office ne’ebé tutela iha Ministeriu Negosiu Estranjeiru no Kooperasaun (MNEK) ne’ebé sai nu’udar intermediariu iha âmbitu projetu ida ne’e.
Serimonia abertura ba estudu viabilidade ne’e finansia husi Uniaun Europeia no Implementa husi Sekretariadu OACPS (Organization of African, Caribbean, and Pacific States) no OACPS R&I no konta diskursu husi Prezidenti Konsellu Ezekutivu INCT, Dr. José Cornélio Guterres, Sekretáriu-Jeral Asistente Departamentu Asuntus Politikus no Dezenvolvimentu Umanu OACPS, Dr. Norbesrt Richard Ibrahim, Delegasaun Uniaun Europeia iha Timor-Leste, Embaixador Andrew Jacobs, Prezidenti Painel Peritu PSF, Dr. Deonísio Soares Babo, Vise-Ministru Negosiu Estranjeiru no Kooperasaun Timor-Leste, Sr. Julião da Silva no Diretora Jeral Ministériu Ensinu Superior, Siênsia no Kultura, Dra. Maria Filomena Lay.