Díli, 23 Setembru 2021 – Diretor Ezekutivu Fundu Dezenvolvimentu Kapital Umanu (FDCH, sigla iha Português), Sr. Hermenegildo da Silva hamutuk ho Vise-Prezidenti I Konsellu Ezekutivu Institutu Nasional Siênsia no Teknolojia (INCT, Sigla iha Português), Dr. Valentim Ximenes hala’o abertura ba formasaun Enumerador sira iha salaun enkontru FDCH, Palasiu Governu.
Objetivu husi formasaun ne’e atu lesiona enumerador sira kona ba kestionariu ne’ebe sei utiliza hodi halo levantamentu dadus ba benefisiariu sira ne’ebe finansia diretamente husi FDCH iha tinan 2015-2020.
Diretor Ezekutivu FDCH, Dr. Hermenegildo da Silva iha ninia intervensaun hatete “ida ne’e fundu espesial husi Governu hodi kapasita ita nia rekursus Umanus no agora ita iha programa 4 (haat) hanesan Formasaun Profisional, Formasaun Tékniku, Bolsa Estudu no Formasaun Seluk (Outras Formação)” no ita nia objetivu atu entrevista sira hodi halo avaliasaun ba programa FDCH nian. Vise-Prezidenti I Konsellu Ezekutivu INCT, Dr. Valentim Ximenes alerta ba enumerador sira atu foka ba iha formasaun ida ne’e no hatudu seriedade hodi ba foti dadus.
Total Enumerador ba formasaun durante loron 3 (tolu) ne’e hamutuk haat nulu (40) kompostu husi feto rua nulu (20) no mane rua nulu (20) ne’ebe mai husi Universidade sira iha Díli laran. Partisipa iha enkontru ne’e Xefe Departamentu sira husi INCT no FDCH, Ekipa Tékniku sira no Investigador Dr. Afonso Almeida no Dr. Carlos de Deus.