Díli, 21 Juñu 2021, Iha tinan ida ne’e (2021), INCT loke konkursu ba Peskiza ne’ebe liu husi etapa lubun balun hanesan Selesaun Dokumentus no Aprezentasaun Proposta Peskiza, ho ida ne’e iha loron 21 Juñu, peskizador aprovadu sira asina kontratu peskiza ho INCT iha sala enkontru INCT, Balide.
Peskizador sira mai husi Instituisaun Ensinu Superiór Públika no Privada iha Timor laran nomós balun mai individualmente. INCT sei finansia programa Projetu Peskiza Sientífika sanulu resin hitu (17) ne’ebe pasa ona ba peskizador.
Ho asina kontratu ne’e hanesan faze ida hodi hahu hala’o peskiza iha terenu hodi halo levantamentu dadus hodi elabora to’o final bele halo publikasoens. Objetivu prinsipal husi peskiza sientífiku ne’e atu fornese dadus kredivél ba Governu sira hodi bele foti desizoens nomos liu husi peskiza ne’e bele sai referênsia sientífika ba iha jornal sintififíku no livru, espesialmente kontribui ba dezenvolvimentu interese Nasional no“bem estar” ba komunidade.
Vise-Prezidente II Konsellu Exekutivu INCT, Dr. Augusto da Conceição Soares halo esplikasaun ba peskizador sira katak “antes hahu imi nia peskiza tenki submete uluk kalendariu peskiza nian, nune’e Institutu sei monitoriza peskizador sira, ho ida ne’e bele hare estudu ne’e rasik, tanba INCT mak sei garante kualidade ba peskiza ne’e”.
Serimónia ne’e partisipa husi Vise-Prezidente I Konsellu Ezekutivu INCT, Dr. Afonso de Almeida, Vise-Presidente II Konsellu Exekutivu INCT, Dr. Augusto da C. Soares no Xefe Departamentu Teknolojia no Inovasaun (DTI), Dra. Jesuina Inês do R. de Sousa, MT.