Díli, 18 Juñu 2021 – Institutu Nasional Siênsia no Teknologia (INCT, sigla iha Português) hala’o sorumutu virtual “zoom-meeting” ho peskizadores sira ne’ebe aprovadu depois liu husi prosesu selesaun dokumentus nomos aprezentasaun proposta peskiza, iha Balide.
Objetivu husi sorumutu ne’e atu dizemina kritérius kontratu peskiza nian ba peskizadores sira, hahu husi asina kontratu to’o iha publikasaun artigu sientífiku.
Enkontru virtual ne’e loke direita husi Presidente Konsellu Ezekutivu INCT, Dr. José Cornélio Gutteres, hateten “INCT hanesan institusaun ida ne’ebe ho nia papel importante atu promove peskiza sientífika mak iha tinan ne’e INCT fornese fundus balun ba kolegas manan nain sira atu halo peskiza ne’e. Objetivu prinsipal husi peskiza ne’e mak atu fornese dadus ida ne’ebe kredibél ba ita nia Nai Ulun sira hodi foti desizoens polítika depois bele hamosu obra referênsia sientífikas iha universidade” atu remata nia mos husu ba peskizador sira atu halo publikasoens ida iha jornal nasional nomos internasional.
Tuir planu husi parte rua sei asina kontratu iha 20 Juñu 2021, nune’e asina ona kontratu peskizador sira bele hahu halo ona peskiza. Prezidente mos relata tan katak “wainhira peskizador sira halo prosesu peskiza iha terenu, INCT sei ba monotoriza nune’e bele hare estudu ne’e kredivél ou lae, tanba Institutu mak sei garante ida ne’e rasik”. INCT fornese mos mentor atu akompaña peskizador sira liu-liu iha prosesu hakerek, lójika estrutural, metodolojia katak buat hirak ne’e interligadu ka korespondensia ba malu no publikasaun. Objetivu husi publikasaun ne’e rasik atu promove personalidade individual peskizador sira ba iha Institusaun sira no Mundu Internasional.
Iha fatin hanesan Vise-Prezidente I Konsellu Ezekutivu INCT, Dr. Afonso de Almeida halo mos esplikasaun tékniku konaba akordu asina kontratu entre peskizadores sira ho INCT. Manan nain sira mai husi Instituisaun Ensinu Superior Públiku no Privada (IOB, UNITAL, ISC, ETCI, UNDIL, UNTL) no balun individualmete. Total manan nain hamutuk 16 husi submisaun proposta 30 ba peskiza sientífiku. Sorumutu ne’e partisipa mos husi Vise-Prezidente II Konsellu Ezekutivu INCT, Dr. Augusto da Conceição Soares, tekníku no funsinariu INCT rasik.