Dili, 27 Fevereiro 2020, Instituto Nacional de Ciências e Teknologia (INCT) realiza debate sientifiku ida ho tema “Gravida Sedu iha Jovens Adolecentes no Nia Implikasaun ba Socio-Ekonomiku iha Timor-Leste”.
Objectivo husi debate sientifiku ne’e hodi identifika kauza principais ba kazu gravida sedu iha jovens adolocentes nebe disturba aspetu degradasaun moral no fo’o impaktu ba socio-ekonomiku nivel familia, komunidade no sociedade Timor-Leste em jeral.
Secretario de Estado Arte e Cultura (SEAK), Sr. Teofilo Caldas reprezenta Ministro Ensino Superior, Siencia no Kultura hodi loke abertura ofisial ba debate sientifiku ne’e iha salaun IAN MARTIN, Balide, Dili.
Iha debate sientifiku ne’e Presidente Konselho Executivo INCT, Dr. José Cornélio Guterres iha nia breve palavra koalia katak tema ida ne’e importante tebes no mos transvesais, tanba ligadu ho aspetu Saude, Edukasaun no Ekonomiku inklui Etika no moral. Ho nune’e, INCT konvida entidades kompetente ho sira nia espesialidade iha area refere hosi instituisoens relevante mai sai nudar oradores hodi habelar informasaun, konhesimentu no experiensia advokasia kona ba oinsa bele solusiona kazu gravida sedu.
Alende ne’e, lider INCT ne’e afirma nia konfiansa katak ideas, informasoens no experiensia advokasia hosi oradores sira bele sai hanesan rekomendasoes polítika ba governo no iha tempo hanesan bele konsidera nudar referensia ba estudantes sira iha nivel eskola secundario no publik nia konhesimentu.
Debate sientifiku ne’e involve oradores hosi Komisaun F – Parlamento Nasional, Ministeiro Publiko, Ministerio da Saude no Ministerio Edukasaun inklui Organizasaun Non-Governamentais (NGO) no reprezentante hosi konvensoens relijiojo, hanesan; (1). Dra. Zelia Trindade, Procuradoria da Republika, (2). Sr. Luis Manuel da Costa Fernandes, Diretor Jeral Ensino Secundario, (3). Dra. Judit Dias Ximenes, Presidente Rede Feto, (4). Dra. Maria G. Barreto, Presidente Komisaun F, (5). Me. Guilhermina Marçal, FdCC., Superiora Komunidade Canossiana Timor-Leste.
Debate sientifiku ho tema “Gravida Sedu iha Jovens Adolecentes no Nia Implikasaun ba Socio-Ekonomiku iha Timor-Leste” modera hosi Dra. Ana Isabel Fátima Sousa Soares, Ph.D., Assesora Asuntu Saude no Social iha Komisaun F – Parlamento Nasional Timor-Leste.