Depois de Conselho Ministro VIII Governo Constitucional aprova perfil foun INCT no fo’o pose ba Presidente no Vice-Presidente Ezekutivu iha Maio 2019, Presidente ho Vice-Presidente inisia kontaktu ho instituto peskizas sira iha nivel regional no mos internacional, liuliu ho país vizinho sira hanesan Australia, Indonesia no nasoens sira iha rejiaun sudeste asiátiku.
Iha Setembro 2019, Presidente no Vice-Presidente Ezecutivu INCT, atende konferensia nebe konvoka hosi UNESCO iha Jakarta, Indonesia no mos iha Bangkok, Tailândia. Liuhosi biban ne’e, Presidente ho Vice-Presidente estabelese kedas redi kontaktu ho UNESCO Jakarta no Bangkok, nune’e mos aproveita tempo hodi halo vizita ba Instituto Nasional Siensia no Teknologia (LIPI) Indonesia nian hodi koalia kona ba posibilidade estabelese kooperasaun akademik entre Instituto Nasional Siensia no Teknologia (INCT) ho Lembaga Ilmu Pengetahuan Indonesia (LIPI), Indonesia. Vizita refere nudar momento inisiu ba INCT no LIPI hahú estabelese parceria institusional.
Kooperasaun institusional iha nivel bilateral entre INCT ho LIPI afirma ho asina memorandum entendimentu “memorandum of undestanding – MoU” iha dia 18 de Novembro 2019 iha abertura seminariu internasional ba komemorasaun dia mundial siensia iha Timor-Leste.
MoU refere asina hosi Dr. José Cornélio Guterres, Ph.D., Presidente INCT ho Dr. Laksana Tri Handoko, M.Sc., Diretór Instituto NacionalmSiensia no Teknologia Indonesia (Lembaga Ilmu Pengetahuan Indonesia – LIPI) reprezenta intituisaun ida-idak. Kooperasaun entre INCT ho LIPI fokus ba peskiza pura no aplikada hodi dezenvolve siênsia, teknologia no inovasaun iha kontextu akademik. Kooperasaun ne’e atu bele halo peskiza nebe bele kontribui ba hatúr politika dezenvolvimentu nebe digno no sustentavel. INCT nos LIPI iha komitmentu katak kooperasaun entre institusaun rua ne’e tenki lori benefisiu mútua ba nasaun no povo Timor-Leste no Indonesia.