Díli, 09 Setembru 2026 – Institutu Nasional Siénsia no Teknolojia (INCT, sigla iha portugés), liu husi Prezidente Konsellu Ezekutivu INCT, Prof. Dr. José Cornélio Guterres, realiza abertura ba formasaun online dahuluk, kona-bá: Sistema Internasional ISSN (International Standard Serial Number), ne’ebé mak fasilita, Dra. Vanessa Sourisseau, nomós Dra. Rayanne Silva, husi Sekretariadu ISSN Internasional, lokaliza iha Paris, França.
Objetivu prinsipal husi formasaun dahuluk refere maka: atu fó introdusaun jeral kona-bá funsionamentu ISSN Network, responsabilidade hosi ISSN International Centre nomós National Centres, no mós atu aprezenta feramenta no servisu prinsipal sira, ne’ebé uza hosi rede ISSN hanesan: ISSN Portal, ISSN+, Plataforma XWIKI, ROAD, Keepers Registry, Metadata, Katalogasaun no lala’ok enkontru kada tinan husi rede ISSN Internasional nst…
Iha abertura refere, Prezidente INCT, informa katak: “formasaun ne’e, nu’udar oportunidade importante ida, atu aprofunda koñesimentu tékniku no institusionál, ne’ebé nesesáriu ba funsionamentu Centro Nacional ISSN, nune’e mós atu prepara ekipa nasionál, ba etapa sira tuir mai kona-ba: implementasaun no operasionalizasaun sentru nasional ISSN Timor-Leste. Tanba ne’e, ha’u enkoraja formandu hotu-hotu, atu partisipa ho ativu iha formasaun tomak, husu pergunta, fahe esperiénsia, no aproveita didi’ak oportunidade folin-boot ida-ne’e, hodi aprende diretamente husi peritu sira, Sentru Internasionál ISSN nian”.
Nia Salienta liutan. Ami valoriza tebes koperasaun entre INCT no Sentru Internasionál ISSN, no ami hein katak: formasaun ida-ne’e, sei hametin liután parseria ida-ne’e no kontribui ba susesu estabelesimentu no funsionamentu sustentável Sentru Nasional ISSN nian iha Timor-Leste.
Tuir planu formasaun refere, sei realiza durante fulan rua (2), molok lansamentu ofisial ba Sentru Nasional ISSN, ne’ebé tuir planu; sei realiza iha loron 10 Novembru 2026 tinan ne’e.
Partisipa iha formasaun refere; kompostu husi Diretor Nasional, Peskizador INCT, Xefe Departamentu nomós tékniku espesializadu sira ba área IT, Katalogasaun nomós Finansas.
