Díli, 21 Jullu 2026 – Institutu Nasional Siénsia no Teknolojia (INCT, sigla iha portugés), liu husi Diretor Nasional Siénsia Sosiais no Humanas, Dr. Leonel da Costa Xavier, akompaña husi, Xefi Unidade Peskiza Siénsia Sosiais no Humanas, Sra. Maria J. A. da Costa Gonçalves, hala’o monitorizasaun ba projetu peskiza sientífika tinan fiskal 2026, ne’ebé lidera husi Investigador Prinsipál, Dr. Hélio Brites da Silva, ho títulu: “Desenvolvimento do Turismo em Timor-Leste: International Tourist Intentions to Recommend and Visit the Adventure Tourist Destination.” Atividade monitorizasaun ne’e, realiza iha Timor Plaza, Díli, Timor-Leste.
Objetivu prinsipál husi monitorizasaun ne’e, maka: atu observa diretamente progresu implementasaun projetu peskiza, liu husi observasaun ba prosesu rekolla dadus no entrevista, ne’ebé investigador prinsipál hala’o iha “Manny Timor Tour”, Timor Plaza. Monitorizasaun ida ne’e mós, atu garante atividade peskiza, lao tuir metodolojia, objetivu no padraun sientífiku sira, ne’ebé hakerek ona iha proposta peskiza, ne’ebé submete ba INCT. Nune’e, bele asegura kualidade, kredibilidade no integridade rezultadu peskiza nian.
Atividade monitorizasaun ne’e hetan partisipasaun husi ekipa monitorizasaun INCT, Diretor Nasional Siénsia Sosiais no Humanas, Dr. Leonel da Costa Xavier, Xefi Unidade Peskiza Siénsia Sosiais no Humanas, Sra. Maria J. A. da Costa Gonçalves, Investigador Prinsipál, Dr. Hélio Brites da Silva no reprezentante “Manny Timor Tour” hanesan mós organizadóra ba turístiku, Sra Domingas M. Magno.