Ainaro, 03 Jullu 2026 – Instituto Nasional Siénsia no Teknolojia (INCT, sigla iha portugés), liu husi, Diresaun Nasional Katalogasaun Siénsia no Repozitóriu Sientífiku Nasional, Diretor Benvindo D. J. Guterres, hamutuk ho Kordenador Jeral Projetu Peskiza Eradikasaun Pobreza, Dr. Rui Augusto Gomes, hala’o enkontru ho Prezidente Autoridade Munisipal Ainaro, Sra. Manuela Georgina Carmo Bucar Corte Real, iha Gabinete Administrasaun Munisipal Ainaro.
Objetivu husi enkontru refere maka, atu introduz kona-bá inisiativa peskiza, kona-bá eradikasaun pobreza, ne’ebé maka sei hala’o iha munisipiu Ainaro nomós husu apoiu kolaborasaun husi Administrasaun Munisipal Ainaro, ba reforsa kordenasaun ho autoridade Postu Administrativu nomós Suku sira, durante prosesu rekolla dadus iha terenu.
Iha enkontru refere, Prezidente Autoridade municipal Ainaro, kontente simu ekipa INCT, nomós peskizador nasional sira no kompromete, sei apoiu maka’as inisiativa peskiza refere, hodi bele kontribui ba ajuda governu, iha prosesu formulasaun polítika públika no tomada ba desizaun sira, ligadu ho politika ba eradikasaun pobreza. Iha biban hanesan, Prezidente Autoridade Munisipal Ainaro mós kompromete, sei orienta autoridade postu nomós lokal sira, hodi indika pontu fokal ka mata-dalan sira, ba apoiu peskizador nasional iha terenu.
Iha enkontru refere, Diretor Benvindo D. J. Guterres, introduz kona-bá missaun prinsipal INCT, ba promosaun siénsia, teknolojia no inovasaun iha Timor-Leste nomós mandatu INCT nian, ba apoiu governu implementa polítika bazeia ba evidénsia sientífika. Diretor mós esplika kona-bá, inisiativa projetu peskiza eradikasaun pobreza, nu’udar rekomendasaun husi Parlamentu Nasional, inkluidu mós peskiza kona-bá ekonomia verde ho ekonomia azul.
Iha biban hanesan, Dr. Rui Augusto Gomes, introduz kona-bá peskiza eradikasaun pobreza ho títulu: “Study on the Development and Implementation of Solutions for Poverty Eradication in Timor-Leste”ninia objetivu, metodolojia rekolla dadus nomós suku sira, ne’ebe maka identifikadu, nu’udar tarjetu ba rekolla dadus.
Tuir planu, prosesu rekolla dadus iha munisípiu Ainaru, sei hahu iha loron 10-15 Jullu 2026, ne’ebé maka sei kobre ba área sira hanesan: postu administrativu Ainaro (suku Suro-Craik no Mau-Nuno); postu administrativu Maubisse (Suku Maubisse, Manelobas & Edi); postu administrativu Hato-Udo (Suku Leo-Lima) nomós postu administrativu Hatu-Builico (Suku Nunu-Mogue).
Enkontru refere, hetan mós partisipasaun máximu husi: Diretor Servisu Munisipal ba Apoiu Organizasaun Governamental no Organizasaun Komunitária munisípiu Ainaro, Sr. Jonato Dias Araujo Xavie ho nia Xefe Departamentu.