Díli, 29 Juñu 2026 – Institutu Nasional Siénsia no Teknolojia (INCT, sigla iha portugés) liu husi Prezidente Konsellu Ezekutivu INCT, Dr. José Cornélio Guterres, ho estrutura tomak, hala’o reuniaun ho Diretora Sentru Internasional ISSN Fransa, Dra. Aëlle Béquet ho ekipa, liu husi virtuál online, iha salaun INCT, Balide, Díli, Timor-Leste.
Objetivu husi reuniaun refere maka, atu hala’o diskusaun téknika, kona-bá prosesu lansamentu ofisial, ba akordu estabelesementu Sentru Nasional ISSN iha Timor-Leste, ne’ebé tuir planu sei realiza iha final fulan Agostu tinan 2026. Aleinde ne’e, hala’o mos diskusaun, kona-bá kestões téknika sira, hanesan; formasaun ba jestor no tékniku INCT, finansiamentu nomós envolvimentu INCT iha futuru konferensia no enkontru altu nível sira entre membru ISSN Internasional.
Iha enkontru refere Prezidente Konsellu Ezekutivu INCT, Dr. José Cornélio Guterres, hato’o agradesementu no profunda apresiasaun ba Diretora Sentru Internasional ISSN no ekipa tomak, ba sira nia esforsu, hodi apoiu Timor-Leste, liu hosi INCT, bele adere ba Sentru Internasional ISSN, inklui mos envolvimentu Timor-Leste, iha reuniaun assembleia jerál, ne’ebé mak hala’o iha loron 17 Juñu 2026.
Enkuantu Diretora Sentru Internasional ISSN, Dra. Aëlle Béquet, kongratula INCT ba esforsu tomak no informa katak, agora dadauk Timor-Leste sai ona membru ba Sentru Internasional ISSN no hein prosesu asinatura formal ba akordu entre parte rua. Diretora ne’e mos salienta katak, ba oin Sentru Peskiza hotu-hotu iha Timor-Leste, sei hetan ISSN diretamente husi Institutu Nasional Siénsia no Teknolojia (INCT, sigla iha portugés).
Iha enkontru refere, Prezidente Konsellu Ezekutivu INCT, nomeia mos pontu fokal ba kordenasaun téknika entre Sentru Internasional ISSN nomós INCT, inklui mos determina data ba formasaun ho lansamentu ne’ebé sei hala’o entre fulan agostu-novembru.
Reuniaun refere hetan partisipasaun maximu husi Prezidente Konsellu Ezekutivu INCT Dr. José Cornélio Guterres, Vise-Prezidente I Konsellu Ezekutivu INCT, Dr. Valentim Ximenes, Vise-Prezidente II Konsellu Ezekutivu INCT, Dr. Augusto da Conceição Soares, Investigador Internasional INCT, Dr. Filipe Abraão Martins do Couto, Diretor Nasional Katalogasaun Siénsia no Repozitóriu Sientífiku Nasional (DNKSRSN) INCT, Sr. Benvindo D. J. Guterres, Diretor Nasionál Siénsia Sosiais Humanas INCT, Dr. Leonel da Costa Xavier, Diretora Nasionál Teknolojia Inovasaun INCT, Sra. Jacinta dos Santos nomós Diretora Sentru Internasional ISSN Paris-Fransa, Dra. Aëlle Béquet ho ekipa.