Díli, 17 Abril 2025, Institutu Nasional Siénsia e Teknolojia (INCT, sigla iha portugés), hamutuk ho Peskizador sira, realiza formasaun konabá étika peskiza nomós téknika koleksaun dadus ba enumerador sira iha Sala Mestradu, Kampus-B IOB, Pantai Kelapa, Díli, Timor-Leste.
Reprezentante husi INCT Sr. Benvindo D. J. Guterres, nu’udar mós Responsavel Jeral ba Projetu peskiza ho títulu “Study on the Development and Implementation of Solutions for Poverty Eradication in Timor-Leste”, iha nia intervensaun hateten katak, “Projetu peskiza ne’ebe maka lidera husi Dr. Rui Augusto Gómes ne’e importante tebes, liu-liu oinsa bele ajuda governu hodi foti desizasaun, dezeña no formula polítika públika sira, ne’ebé maka bazeia ba evidénsia sientífika, hodi bele kontribui ba eradikasaun pobreza no hadiak bem-estar populasaun nian. Sr. Benvindo Guterres mos realsa katak, projetu peskiza refere nu’udar mós rekomendasaun husi Parlamentu Nasional ba INCT, iha ámbitu aprezentasaun no debate ba orsamentu jeral Estadu iha tinan kotuk”.
Iha sorin seluk, Koordenador Jeral ba Projetu Peskiza Dr. Rui Augusto Gomes, iha nia intervensaun, hato’o agradese wa’in tebes ba INCT, ne’ebé maka fo konfiansa bo’ot tebes ba ekipa IOB ne’ebé maka maioria kompostu husi peskizador Timor Oan, hodi halo peskiza konabá eradikasaun pobreza ne’ebé sei kobre munisipiu Baucau, Ermera no Ainaro. Iha biban hanesan Dr. Rui Gomes mos enkoraja Peskizador no enumerador sira hotu, atu hala’o peskiza ho responsabilidade no seriedade nune’e, bele hamosu rezultadu peskiza ne’ebé maka di’ak hodi ajuda governu.
Enkuantu formasaun refere, hetan aprezentasaun husi Dra. Jacinta dos Santos Guterres konabá, importansia husi étika ba peskiza ka koleksaun dadus hodi garante integridade sientífika no protesaun ba direitu ho dignidade informantes sira. Nune’e mos aprezentasaun husi Dr. Natalino Ximenes, konabá utilizasaun instrumentu ba rekolla dadus nomós simulasaun ba entrevista.