![](https://i0.wp.com/localhost/inct.gov.tl/wp-content/uploads/2020/05/IMG_8602-Copy-1024x682.jpg?resize=819%2C545)
Iha dia 18-19 Novembro 2019, Instituto Nacional de Ciências e Tecnologia (INCT) organiza seminariu sientifiku Internasional iha ámbito selebrasaun loron mundial siensia ba paz no ba dezenvolvimentu no mos komemora loron Ensino Superior Timor-Leste. Seminariu ho tema “Ciência Pela Paz e Pelo Desenvolvimento: Fortalecer as Capacidades de Pesquisa Científica e Inovação em Timor-Leste”.
Objectivu husi seminariu ne’e atu hodi partilha informasaun ba publiku sobre importansia peskiza ba prosesu dezenvolvimentu siensia no teknologia iha Timor-Leste, liuliu peskiza puro hodi deskobre siensia foun no mos peskiza aplikadas nebe’e bele kontribui ba polítika dezenvolvimentu ho prinsipiu evidence-based policy.
Iha serimonia abertura seminariu ne’e, Presidente Executivu INCT, Dr. Jose Cornélio Guterres, Ph.D. ho Dr. Laksana Tri Handoko, M.Sc., Kepala LIPI Indonesia asina memorandu de entendimentu (MoU) representa instituisõens ida-idak hodi estabele koperasaun sientífika (peskiza) entre Indonesia ho Timor-Leste. Asinatura MoU ne’e sasin direita husi S.E. Dr. Longuinhos dos Santos, Ministru MESCC no S.E. Dr. Fidelis Magalhães Leite, Ministro Reforma Legislativa no Assuntu Parlamentar (MRLAP).
Seminariu ne’e involve oradores Nasional hanesan; Dr. João Mariano Saldanha, Presidente João Saldanha University (JSU), Prof. Dr. Nelson Martins, Eis Ministro Saude, Dr. Samuel Venancio Freitas, Dekano Fakuldade Siensia Exata UNTL, Dr. Fernando Gusmão, Dekano Fakuldade Siensia Sosiais no Umaniora UNPAZ, Dr. Afonso de Almeida, Vice Presidente INCT. Seminariu ne’e mos partisipa husi oradores Internasional nain tolu (3) hanesan; Dr. Laksana Tri Handoko, M.Sc., Kepala LIPI Indonesia, Diretur UNESCO ba Asia Pacific, representa husi Ms. Noelle Poulson, Koordenador UNESCO Antena iha Dili, Timor-Leste no Dr. Antonio Correia E Silva, Eis Ministro Ensino Superior, Siensia no Teknologia Cabo Verde.
Oradores sira hotu, tantu nasional no internasional aprezenta varias topiku nebe’e relasiona ho prosesu desenvolvimentu siensia no teknologia. Sira mos koalia kona ba importansia instituto nasional siensia no teknologia iha Timor-Leste hodi kontribui ba polítika desenvolvimentu nasaun nian.
Seminariu sientífiku ne’e taka ho atribuisaun premiu ba manan nain husi kompetisaun sira hanesan; Ensino Superior Cup, Diskursu Sientífiku, Jogo Futsal, Voleyball mane no feto husi instituisõens superioris sira iha Timor-Leste.