INCT HALO MONITORIZASAUN DIREITA BA PESKIZA HUSI DR. ACÁCIO CARDOSO AMARAL KONABA IDENTIFIKASAUN BORAKS IHA BAKSO
Díli, 13 Juñu 2025, Diretór Nasionál Siénsia Exatas e Naturais INCT, Sr. Valente Pereira hamutuk ho ekipa halo monitorizasaun direita ba peskiza sientífika hosi investigador prinsipal Dr. Acácio Cardoso Amaral konaba “Identificação da Prezença de Borax em Almôndegas (Bakso)” iha Laboratório Kímika Infordepe, Balide, Dili.
Diretór Nasionál Siénsia Exatas e Naturais INCT, Sr. Valente Pereira nia hateten katak prezensa INCT nian iha Laboratório Kímika Infordepe balide ida ne’e, hodi halo monitorizasaun liu husi observasaun direita ba projetu peskiza ne’ebe mak halao hela hosi Dr. Acácio Cardoso Amaral ho nia ekipa konaba ba identifikasaun Boraks iha Bakso, nune’e bele asegura kualidade peskiza tuir prosedimentu tékniku, metodolójiku nomos étika peskiza INCT nian. Iha sorin seluk, Dr. Acácio Cardoso Amaral hanesan peskizador prinsipal nia hateten katak Ami halo hela Peskiza ida ho titulu “Identifikasaun Boraks iha Bakso, Timor-Leste” ho objetivu oinsa atu hatene iha ka lae, Boraks iha Bakso ne’ebe ema fan. Agora dadauk ami halibur ona amostra bakso husi fatin lubuk ida iha dili, baucau, aileu, suai no maliana. Ne’ebe Prosesu teste lao hela iha Laboratório Kímika Infordepe nian no rezultadu ami sei fo sai iha tempo badak.
