INCT HALAO AKORDU ASINATURA MEMORANDU ENTENDIMENTU HO TIC TIMOR I.P
Díli, 05 Juñu 2025 – Institutu Nasional Siênsia no Teknolojia (INCT, sigla iha Português) ofisialmente realiza asinatura Memorandu Entendimentu (MoU) ho Agência de Tecnologias de Informação e Comunicação, I.P. (TIC Timor I.P, Sigla iha Português) iha sala konferensia INCT, Balide, Dili.
Objetivu husi seremónia asinatura Memorandu Entendimentu ne’e maka kooperasaun konaba fornesimentu servisu teknolojia, informasaun no komunikasaun (TIK) liu-liu konaba dezenvolvimentu atividade husi TIC Timor maka hanesan; Email ofisial, Kolokasaun Servidor, Apoiu Tékniku konaba Instalasaun Ekipamentu Firewall, QNAP no Servidor, Konektividade, Hosting Services, Hosting web Portal INCT no Hosting Sistema Informasaun INCT.
Presidente Konsellu Ezekutivu INCT iha nia intervensaun hateten, antes ne’e INCT halo servisu hamutuk ho ajensia internasional ida ho naran Organisation of African, Caribbean and Pacific States (OACPS) hamutuk ho Uniaun Europea hodi ajuda INCT halo estudus ida, oinsa atu kria repositóriu nasional iha Timor-Leste. Nune’e iha tinan 2024, INCT tau osan hodi halo instalasaun ba software Repositório Dijital, ne’ebe hahu husi ne’e, nia prosesu tomak TIC Timor mak sempre akompaña hodi fo solusaun téknika ba repositóriu sientífiku nasional INCT, nu fim instalasaun ne’e bele akontese duni. Repositorio ne’e nia funsaun rasik hodi armajena materia sientífiku hotu-hotu ne’ebe INCT rasik halao no husi ita nia matenek sira iha timor laran tomak no internasionais sira.
Presidente INCT hatutan tan katak, nune’e wainhira repositório ne’e instala ona, ba oin INCT nafatin kopera ho TIC Timor hodi hare liu konaba seguransa repositório dijital ne’e rasik, nune’e iha loron ida ohin ne’e, INCT ho TIC Timor sei asina akordu ida hodi asegura servisu ne’e lao ho diak nafatin ba oin.
Presidente Konsellu Administrasaun no Diretur Ezekutivu TIC Timor I.P, Sr. Venancio Pinto nia hateten katak ho estabelesimentu asina akordu memorandu entendimentu ida ne’e TIC Timor prometidu nafatin fornese servisu lubuk ida ne’ebe relasiona ho Sentru Dadus, Infrastrutura Redi, Cyber Security no Aplikasaun Dijitalizasaun nudar servisu prinsipal no fundamental entre TIC Timor ho INCT liu hosi akordu ida ne’ebe sei akontese.
Partisipa iha sorumutu asinatura Memorandu Entendimentu ne’e maka hanesan I Vise Presidente Konsellu Ezekutivu, Dr. Valentim Ximenes, Sekretaria Ezekutiva INCT, Dra. Maria Elsa Diogo Correia, Assesor Investigasaun INCT, Dr. Filipe Couto, Diretór Nasionál Katalogasaun Siénsia no Repózitoriu Sientífiku Dijitál INCT, Sr. Benvindo Guterres, Direitor Sentru Dadus TIC Timor, Sr. Rusmin Vicente de Fatima Soares, Direitor Aplikasaun TIC Timor, Sr. Justo Fernandes, Diretur Infraestruturas Redes TIC Timor, Sr. Henrique Fulgencio Guterres Chefe Gabinete TIC Timor, Sra. Merlin Sofia Guterres Alves no Funsionariu Tékniku INCT sira.
