Díli, 5 Setembru 2023 – Institutu Nasional Siênsia no Teknolojia (INCT, sigla iha Português) selebra ninia ezistensia ba dasia (IX) iha abertura atividade selebrasaun loron nasional ba ensinu superior no loron mundial ba siênsia, iha salaun Katedral – Bebora.
Iha intervensaun, Prezidente Konsellu Ezekutivu INCT, Dr. José Cornélio Guterres agradese ba konvidadu sira ne’ebé prezente iha selebrasaun Die Natalis ida ne’e hafoin nia kriasaun iha loron 3 Setembru 2014. Nia afirma katak, kriasaun INCT ne’e reflete ba ita nia Planu Estratéjiku Dezenvolvimentu Nasional (PEDN) ne’ebé ho referênsia atu dezenvolve infraestrutura no aumenta kualidade rekursu umanu. Segundu mak atu kumpre ezijênsia ne’ebé prevê iha Konstituisaun RDTL katak “Estadu tenke garante ba sidadaun hotu-hotu, tuir sira nia kapasidade, asesu ba grau aas iha ensinu investigasaun sientífika” no terseira mak atu liga ho formulasaun Ministeriu Edukasaun nian katak siênsia, teknolojia no inovasaun hanesan pontu importante ne’ebé sei garante sustentabilidade no dezenvolvimentu.
Nia mos apela katak desde 2019 to’o agora, INCT dezenvolve atividade sira ne’ebé hodi promove siênsia, inovasaun no teknolojia hanesan matéria Investigasaun sientífika nian, matéria dezenvolvimentu patrimonio intelektual Timor-Leste, elabora Planu Estratéjiku ba Siênsia to’o tinan 2030.
Iha abertura ba serimonia ne’e, Sua Excia. Ministru Ensinu Superior Siênsia no Kultura (MESSK), Dr. José Honório da Costa Perreira Jerónimo agradese ba konvite no nia afirma katak ho satisfasaun bo’ot ida hodi partisipa iha serimónia ne’e. Nia mos fó parabéns ba dirijentes no funsionariu ba organizasaun no selebrasaun aniversariu INCT ba dasia (9).
Durante nia diskursu, destaka INCT hanesan Instituisaun ida ne’ebé importante tebes ba konstrusaun no dezenvolvimentu sustentável iha Timor-Leste, liu-hosi promosaun peskiza sientífika ne’ebé kontribui hodi buka solusaun ba dezafiu ne’ebé ita nia país enfrenta iha área oioin. Ho ida ne’e, IX Governu Konstituisional pretende atu fortalese INCT ho forma atu dezenvolve no kria koñesimentu sientífiku ho impaktu relevante iha dinamika sosial, ekonomika no kultural. Nia mos promete katak, nu’udar Ministru Ensinu Superior, sei fó apoiu ba INCT.
Partisipa iha serimonia ne’e, I no II Vise-Prezidente Konsellu Ezekutivu INCT, Dr. Valentim Ximenes no Dr. Augusto Conceição Soares, Sekretária Ezekutiva INCT, Dra. Maria Elsa D. Correia, Magnifiku Reitor sira hosi Ensinu Superior Públiku no Privadu sira, Diretor Jeral sira, Diretor Ezekutivu ANAAA, Diretor Nasional sira, Membru Konsellu Jerál no Sientífiku, Investigador no Avaliador INCT nian, Xefe Departamentu sira, tékniku no funsionariu hosi MESSK no INCT.