Díli, 13 Juñu 2023, Institutu Nasionál Siênsia no Teknolojia (INCT, sigla iha Português) hala’o serimónia asinatura kontratu ho Investigador aprovadu sira ba Projetu Peskiza Sientífika INCT nian ba tinan fiskal 2023 nian iha instalasaun INCT, Balide.
Asinatura kontratu ne’e hanesan faze ida hodi hahú hala’o peskiza iha terenu hodi halo levantamentu dadus iha baze. Objetivu prinsipal hosi peskiza sientífiku ne’e atu fornese dadus kredivél ba Governu hodi bele foti desizoens polítikas, nomos liu-husi peskiza ne’e bele sai referênsia sientífika ba iha komunidade akadémika, espesialmente hodi kontribui ba dezenvolvimentu Nasional no “bem estar” komunidade nian.
Iha serimonia asinatura ne’e, Investigador Senior Internasional INCT, Dr. Filipe Abraão Martins do Couto, Komisária Étika INCT, Sra. Jacinta dos Santos Guterres no Sekretaria Ezekutiva INCT, Dra. Maria Elsa Diogo Correia halo aprezentasaun ba peskizadór sira kona-ba Guiaun Elaborasaun Relatoriu ba Rezultadu Investigasaun Sientífika, Étika Investigasaun no Manual ba Ezekusaun Orsamentu Peskiza INCT 2023.
Antes ne’e, ekipa juri halo selesaun ba peskizador Haat Nulu Resin Rua (42) hanesan selesaun halo dokumentu, aprezentasaun proposta peskiza sientífika no ikus mai Juri deside investigador sanlu resin rua (12) mak liu/pasa. Peskizadór/a sira ne’e mai hosi Instituisaun Ensinu Superiór Públika no Privada iha Timor laran.
Partisipa máximu iha seremónia asina kontratu ne’e Prezidente Konsellu Ezekutivu INCT, Dr. José Cornélio Guterres, I Vise-Prezidente Konsellu Ezekutivu INCT, Dr. Valentim Ximenes, II Vise-Prezidente Konsellu Ezekutivu INCT, Dr. Augusto Soares, Diretor sira no Peskizador/a aprovadu sira.