Díli, 21 Abril 2022 – Institutu Nasionál Siênsia no Teknolojia (INCT, sigla iha Português) hala’o reuniaun Konsellu Jerál Daneen ne’ebé prezide hosi Prezidente Konsellu Jerál, Sua Excia. Ministru Ensinu Superior, Siênsia no Kultura (MESSK), Dr. Longuinhos dos Santos, iha salaun enkontru MESSK.
Prezidente Konsellu Jerál, Sua Excia. Dr. Longuinhos dos Santos, iha ninia intervensaun agradese ba esforsu tomak ne’ebé INCT halo hodi realiza reuniaun ne’e no afirma katak, reuniaun ida ne’e atu define liña jerál atividade, halo aprovasaun planu anual, rejimentu, regulamentu no estatutu institutu nian. Nia mos rekomenda atu INCT halo kooperasaun ho Universidade Públiku no Privada sira atu kria kondisaun ba dezenvolvimentu sentru investigasaun, ho forma ida ne’e, sei dezenvolve investigasaun ne’ebé iha impaktu ba iha sosiedade, solisita mos atu halo mapeamentu hodi identifika potensial sentru investigasaun sira ho fin ida atu estabelese koordenasaun ho instituisaun públiku ka privada sira, ho objetivu atu hadi’a kualidade Ensinu Superior.
Partisipa iha reuniaun ne’e mak membru konsellu jerál sira, nomedamente Prezidente Konsellu Ezekutivu INCT, Dr. José Cornélio Guterres, I no II Vise-Prezidente Konsellun Ezekutivu INCT, Dr. Valentim Ximenes no Dr. Augusto Soares, Reitor Dili Institute of Tecnhology (DIT), Dr. Alvaro Menezes Amaral Ph.D, Prezidente Institutu Politékniku Betanu (IPB), Dr. Acácio Cardoso Amaral, PhD, Dr. Vicente Paulo Correia no tékniku sira hosi Ministériu no INCT.