Díli, 8 Marsu 2022 – Diretor Ezekutivu Fundo Dezenvolvimentu Kapitál Umanu (FDCH, sigla iha Português), Dr. Cristóvão dos Reis hamutuk ho estrututa ne’ebé kompoen iha estrutura iha instituisaun, no Dirijente Institutu Nasionál Siênsia no Teknolojia (INCT) hala’o sorumutu ho Investigador ba Avaliasaun Rezultadu ba Programa FDCH 2015 to’o 2020. Sorumutu ne’e prezide hosi I Vise-Prezidente Konsellu Ezekutivu INCT, Dr. Valentim Ximenes, iha instalasaun INCT, Balide.
Objetivu hosi enkontru ne’e atu aprezenta Rezultadu Preleminar hosi Investigador na’in rua: Dr. Afonso de Almeida no Dr. Carlos de Deus. Liu-hosi investigasaun ida ne’e posível atu apura no determina kualidade profisional no grau kualidade empregabilidade rekursu umanu iha área sira hanesan Formasaun Profisional, Formasaun Tékniku, Bolsa Estudu no Formasaun Seluk ne’ebé hetan fundu hosi FDCH durante períodu mensionadu.
I Vise-Prezidente Konsellu Ezekutivu INCT, Dr. Valentim Ximenes iha nia intervensaun hatete rezultadu hosi investigasaun ida ne’e bele kontribui ba liña ministrial sira hodi rezolve polítika ba dezenvolvimentu rekursu umanu iha Timor-Leste, tuir Planu Estratéjiku Dezenvolvimentu Nasionál (PEDN) 2011-2030.
Partisipa iha enkontru ne’e II Vise-Prezidente Konsellu Ezekutivu INCT, Dr. Augusto Soares, Xefe Departamentu Teknolojia no Inovasaun (DTI), Sra. Jesuina de Sousa, Koordenadór Gabinete ba Planu Peskiza Fiskalizasaun no Verifikasaun, Sr. Hermenegildo da Silva, Xefe Departamentu Peskiza, Sr. Fernando do Nascimento no Sra. Maria Godinho.