Iha loron 15 fulan Novembru tinan 2021, Institutu Nasionál Siênsia no Teknolojia (INCT, sigla iha Português) realiza semináriu Aprezentasaun Rezultadu Peskiza Sientífiku INCT Tinan 2021 hodi Komemora Loron Mundial Siênsia ba Paz no Dezenvolvimentu, iha instalasaun Delta Nova, Comoro-Díli.
Objetivu husi semináriu ne’e atu apresenta rezultadu peskiza hitu (7) INCT nian, ne’ebe hala’o husi investigadorador sira iha área hanesan Agrikultura, Edukusaun, Ekonomia no Sosial.
Prezidente Konsellu Ezekutivu INCT, Dr. José Cornélio Guterres iha nia intervensaun afirma “ohin ita komemora Loron Mundial Siênsia ba Paz no Dezenvolvimentu. Iha kontestu Timor-Leste, ita sei promove siênsia atu transforma povu nia moris sai prosperu liu. Siênsia iha força atu transforma povu sai povu ida krítiku no kria dezenvolvimentu ida efisiente no sustentavel, segundu referênsia husi nasaun dezenvolvidu sira, hatudu katak peskiza nu’udar xave ba dezenvolvimentu. Sua Exmo.
Sua Exmo. Ministru Ensinu Superior, Siênsia no Kultura (MESSK) Timor-Leste, Dr. Longuinhos dos Santos, ne’ebé halo abertura iha semináriu ne’e hatete, “iha loron sanulu fulan Novembru marka ona selebrasaun loron Mundial Siênsia ba Paz no Dezenvolvimentu. Inisiativa ida ne’e mai husi nível mundial ne’ebé atu hakbi’it siênsia hanesan instrumentu ida atu promove paz no dezenvolvimentu.
Ministru Ensinu Superior afirma katak, “atu garantia futuru ne’ebe mak di’ak, ita tenke sai sosiedade ne’ebe inklusiva no organizada liu husi sistema ida hanesan hola parte iha Governu, Universidade, Institutu ba Peskiza nian no Empreza sira hodi servisu hamutuk hodi garantia ho forma sistema ida ne’ebé los ba siênsia, teknolojia no ba informasaun”.
Atu termina, nia apela, “INCT tenki aprezenta proposta ba Govenu hodi fó asaun ba medida konkreta sira ne’ebé atu dezenvolve hodi asegura katak siênsia ne’e hanesan forsa ba dezenvolvimentu Timor-Leste nian.
Grasiano Soares Gomes, hanesan peskizador iha área Agrikultura no halo peskiza ba iha produsaun (mistura) hahan ba animal hanesan fahi hatete, “setor agrikultura iha Timor-Leste mak setor ida ne’ebé produtivu tebes”.
Peskizadores sira ne’ebe halo aprezentasaun rezultadu peskiza iha semináriu ne’e mak: Dr. Grasiona Soares Gomes (Efeito do Uso de Farelo de Arroz e Borras de Tofu fermentado com Probiótico à Base de Moringa na Dieta para Melhorar o desempenho Produtivo de Suínos Machos Castrados); Sr. Gabriel Gomes, (Utilidade kulu Ai (Artocarpus heterophyllus) ba Produtu inovativu Kripik hodi Asegura Siguransa Alimentar iha Suku Talimoro); Sr. Fernão dos Santos Rodrigues, (Desafios Da Formação Inicial De Professores: A Lecionação Da Disciplina de Ciência Físico-Naturais no 3º Ciclo Do Ensino Básico, no Currículo Vigente – Um Contributo para a Qualidade do Ensino de Ciências em Timor-Leste); Dr. Carlito de A. M. Code, (Estudo dos Fatores que Influenciam a Sustentabilidade do Desenvolvimento Agrícola no Município de Bobonaro, Timor- Leste); Sr. Augusto Olo Tomé, (Identifika Fator-sira ne’ebe halo alunu-sira abandona atividade aprendizajem: estudu kazu iha sidade Dili); Sr. Julião da Costa Belo, (Elaboração de conteúdos científico-pedagógicos da disciplina de física para a lecionação do 10º ano de escolaridade no ensino secundário); no Sra. Sabina Fernandes, (Marketing strategy analysis for developing small and medium enterprises in Tourism sector of Manufahi Municipality, Timor-Leste).
Konvidadu sira ne’ebé mak partisipa iha seminariu ne’e mak Sua Excia. Ministru Ensinu Superior Siensia no Kultura (MESSK), Dr. Longuinhos dos Santos, Sua Excia. Ministru Edukasaun Juventude no Desportu (MEJD), Dr. Armindo Maia, Sua Excia. Ministru Turizmu Komersiu no Industria (MTKI), Dr. José Lucas do Carmo da Silva, Diretor Jeral sira, Reitor Universidade sira, ONG sira no Estudante Universitariu sira.