Díli, 21 Outubru 2021 – Institutu Nasionál Siênsia no Teknolojia (INCT, sigla iha Português), realiza Semináriu Internasionál Siênsia Viva – Atual Situasaun Epidemiolójika iha Timor-Leste – Variante foun Covid-19, iha instalasaun Universidade Oriental Timor Lorosa’e (UNITAL), Bekora.
Objetivu husi semináriu Internasionál ne’e atu tau hanoin hamutuk relasionadu ho atual situasaun epidemiolójika Covid-19 iha Timor-Leste, liliu moras Variante Foun hanesan Variante Delta. Ho forma ida ne’e, pretende determina problema prinsipal no dezafiu sira ne’ebe ita hasoru durante tempu pandemia ida ne’e.
Prezidente Konsellu Ezekutivu INCT, Dr. José Cornélio Guterres iha nia intervensaun afirma, “seminariu internasionál ne’ebé mak envolve peritus nasionál no internasionál ho objetivu ida atu partilla esperiénsia konaba situasaun epidemolojiku ho forma atu kombate moras ida ne’e. Nune’e mos INCT nia misaun importante atu promove debate sientífiku hodi aponta solusaun ba determinada impase no problema sira. Prezidente mos subliña tan katak “diskusaun husi semináriu ne’e bele rekomenda ba entidade relevante hodi foti desizaun nomos bele utiliza ba referênsia sientífiku sira” (ba área akadémika no sientífika).
Exma. Ministra Saúde, Dra. Odete Maria Freitas Belo, ne’ebé halo abertura ba semináriu ne’e hatete, “semináriu ne’e importante tebes liga ho problema ne’ebé ita nia nasaun no mundu enfrenta, maibe ho inisiativa agora dadauk ne’e atu partilla hamutuk esperiênsia, siênsia, informasaun hanesan testamuñu pozitivu, loos ba ita nia joven, ba estudante no komunidade sira hotu”. Ho forma ida ne’e, kontinua Exma. Señora Ministra Saúde, “Iha tempo ida ne’e ita mos enfrenta hela variante Delta ne’ebé mak sirkula iha ita nia nasaun. Maibe ho ita nia kontribusaun liu husi estratejia preventiva sira hanesan distansia fizíku, uza máskara no fase liman ita bele menan”.
Orador iha semináriu ne’e mak Exma. Ministra Saúde, Dra. Odete Maria Freitas Belo, Diretor Institutu Eijikman Biolojia Molekular, Prof. Dr. Amin Soebandrio, Reprezentante Organizasaun Mundial Saúde (OMS) Dr. Ismael Barreto, MlabMed no modera husi Prof. Dr. João Soares Martins, MPH. Ph.d, Magnífiku Reitor Universidade Nasionál Timor Lorosa’e (UNTL).
Partisipa iha semináriu ne’e Membru Konsellu Estadu, Membru Parlamentu, Membru Relijiozu, Universidade Sira, F-FDTL, PNTL no Sosiedade Sivil sira. Nune’e mos oradores no partisipantes partisipa virtualmente (online).