𝐊𝐎𝐌𝐏𝐀𝐍̃𝐈𝐀 𝐊𝐀𝐈 𝐖𝐀𝐓𝐔 𝐊𝐌𝐀𝐍𝐄𝐊 𝐇𝐎 𝐍𝐈𝐀 𝐉𝐎𝐈𝐍𝐓 𝐕𝐄𝐍𝐓𝐔𝐑𝐄 𝐏𝐓. 𝐀𝐑𝐂𝐇𝐈𝐌𝐄𝐃𝐈𝐀 𝐈𝐍𝐃𝐎𝐍𝐄𝐒𝐈𝐀 𝐊𝐎𝐍𝐒𝐔𝐋𝐓𝐀𝐍 𝐇𝐀𝐋𝐎 𝐀𝐏𝐑𝐄𝐙𝐄𝐍𝐓𝐀𝐒𝐀𝐔𝐍 𝐑𝐄𝐋𝐀𝐓𝐎𝐑𝐈𝐔 𝐅𝐈𝐍𝐀𝐋 𝐃.𝐄.𝐃. 𝐁𝐀 𝐄𝐍𝐓𝐈𝐃𝐀𝐃𝐄 𝐒𝐈𝐑𝐀 𝐇𝐎𝐓𝐔 𝐇𝐔𝐒𝐈 𝐈𝐍𝐒𝐓𝐈𝐓𝐔𝐒𝐀𝐔𝐍 𝐈𝐍𝐓𝐄𝐑𝐋𝐈𝐆𝐀𝐃𝐔 𝐁𝐀 𝐊𝐎𝐍𝐒𝐓𝐑𝐔𝐒𝐀𝐔𝐍 𝐄𝐃𝐈𝐅𝐈𝐒𝐈𝐔 𝐅𝐎𝐔𝐍 𝐈𝐍𝐂𝐓

Díli, 30 Marsu 2026 – Institutu Nasional Siénsia no Teknolojia (INCT, sigla iha Português), halo sorumutu ho konsultor nasional, kompañia Kai Watu Kmanek ho nia joint venture PT. Archimedia Indonesia, iha salaun INCT, Balide, Dili, Timor-Leste.

Objetivu husi sorumutu ne’e, konsultor nasional, kompañia Kai Watu Kmanek ho nia joint venture PT. Archimedia Indonesia, halo aprezentasaun Relatorio Final (Final Report), konaba elaborasaun projetu estudu viabilidade ba Detailed Engineering Design (DED) nian, ba institusaun interligadu sira hotu, iha âmbito Konstrusaun Edifisiu foun INCT nian hanesan; Ministériu Obras Públikas (MOP), Ministéiro Ensinu Superior Siénsia no Kultura (MESSC), Agência Desenvolvimento Nacional, (ADN), Be’e Timor-Leste (BTL), Autoridade Nasional Lisensiamentu Ambiental (ANLA).

Prezidente Konsellu Ezekutivu INCT, Dr. José Cornélio Guterres, iha intervensaun hateten katak, Enkontru ida-ne’e iha signifikadu bo’ot ba INCT, tamba marka momentu importante ida iha prosesu D.E.D. nian, hahu husi preparasaun, elaborasaun dezeñu, koordenasaun teknika, verifikasaun to’o agora tama ona ba etapa aprezentasaun final, hodi taka projetu ida-ne’e ho di’ak.

Prezidente Konsellu Ezekutivu INCT, Dr. José Cornélio Guterres, hatutan ba iha objetivu husi enkontru ida ohin ne’e, atu hare’e hamutuk rezultadu final husi projetu D.E.D., liu-liu bele hato’o apresiasaun ba malu, atu finaliza rezultadu ida di’ak liu tan.

Iha oportunidade ne’e mós, Prezidente Konsellu Ezekutivu INCT, Dr. José Cornélio Guterres, hato’o agradesimentu espesial ba ekipa Enjiñeiru MESCC nian, Eng. Silvestre no ekipa, Ministériu Obras Públika, Diretor no ekipa, ADN, EDTL, BTL, ANLA, CAN, INCT no entidade relevante sira seluk tan, ne’ebé ho esforsu tomak, halo ona verifikasaun ba dezeñu ida-ne’e; grasa ba servisu tomak, koordenasaun no dedikasaun, agora dezeñu ida-ne’e, bele tama iha aprezentasaun final. Kontribuisaun ida-ne’e iha valor bo’ot, tanba la’os de’it garante kualidade teknika, maibé mós nudar parte importante ida husi esforsu atu hametin infraestrutura no dezenvolvimentu institusional INCT ba futuru.  

Ikus liu, iha Prezidente Konsellu Ezekutivu INCT, Dr. José Cornélio Guterres, nia intervensaun, hato’o nafatin obrigado barak ba entidade relevante sira hotu no fiar katak rezultadu ne’ebé aprezenta iha loron ida ne’e, sei sai baze importante ida ba etapa sira tuir mai, ho nune’e, ita hotu tenke kontinua servisu hamutuk ho Espiritu responsabilidade, kolaborasaun no kompromisu atu hametin INCT no atu kontribui ba dezenvolvimentu Timor-Leste.

Partisipa iha sorumutu ne’e Prezidente Konsellu Ezekutivu INCT, Dr. José Cornélio Guterres, Vise I – Prezidente Konsellu Ezekutivu INCT, Dr. Valentim Ximenes, Vise II – Prezidente Konsellu Ezekutivu INCT, Dr. Augusto da C. L. Soares, Sekretaria Ezekutiva INCT, Dra. Maria Elsa Diogo Correia, Direitor Kompañia Kai Watu Kmanek Unipessoal Lda, Sr. Fernando Afonso da Silva, Structur Engneer PT. Archimedia Consultant, Ibu Nila Kurniawati, Xefe Divizaun Aprovisionamentu, Ekipa Tékniku husi PT. Archimedia no Ekipa Tékniku INCT.