Díli, 22 Outubro 2025 – II Vise-Prezidente Konsellu Ezekutivu Institutu Nasionál Siênsia no Teknolojia (INCT), Dr. Augusto da Conceição Soares partisipa iha Audiênsia Públika ho Komisaun G Parlamentu Nasionál ho objetivu hodi halo aprezentasaun ba Ezekusaun atividade INCT to’o fulan outubru 2025 no aprezenta Prosposta Orsamentu INCT nian tinan fiskal 2026 ba Prezidente Komisaun G no Membru sira iha sala reuniaun Komisaun G Parlamentu Nasional, Dili.
Iha aprezentasaun, II Vise-Prezidente Konsellu Ezekutivu INCT, Dr. Augusto da Conceição Soares nia informa ba Presidente komisaun G no membru sira katak INCT nia mandatu prinsipal maka atu promove peskiza sientífika iha área teknolojia no inovasaun, hodi kontribui ba polítika públika no hodi preserva património sientífiku iha estado Timor-Leste. Nune’e atu atinji misaun sira ne’e, INCT sempre servisu bazeia ba planu estratéjiku 2011-2020 inklui mos polítika nono governo nian liu husi Ministerio Ensino Superior Siénsia no Kultura hodi promove siénsia, inovasaun no teknolojia iha Timor-Leste.
II Vise Presidente INCT hatutan tan katak tinan ida ne’e, INCT iha programa prinsipal rua, mak hanesan programa funsionamentu no dezevolvimentu Institusional, ho subprograma tolu, hanesan funsionamentu institusional, dezenvolvimentu instituisional no infraestrutura edifisiu administrativus ho orsamentu original $546,847.00 ho ezekusaun orsamentu $ 319.381.38. Programa daruak mak Ensino superior, ho subprograma tolu hanesan siénsia no teknolojia, peskiza, estudu investigasaun no analisa siénsia aplikada, ikus liu mak promove divulgasaun koñesimentu sientífiku no teknolójiku ho orsamentu original $117,922.00 ho ezekusaun orsamentu $42,579.00.
Partisipa iha Audiênsia Públika ne’e maka Presidente Komisaun G, Sr. Armando dos Santos Lopes ho Membru sira, Diretur Ezekutivu ANAAA, Dr. Nilton Paiva, Xefe Departamentu Polítika Planeamentu INCT, Sr. Calistro Maria Correia no Tékniku Espesializadu Finansas, Sr. Tiago da Silva Xavier.