EKIPA INCT HALO MONITORIZASAUN BA PESKIZA HUSI DR. LILIA DA C. AMARAL BORGERS IHA VENILALE, MUNISIPIU BAUCAU

Venilale, 29 Juñu 2025, Diretór Nasionál Katalogasaun Siénsia no Repózitoriu Sientífiku Dijitál INCT, Sr. Benvindo Guterres hamutuk ho ekipa halo monitorizasaun ba peskiza sientífika hosi investigador Prinsipal, Dra Lilia da C. Amaral Borges ho titulu peskiza “New remote-diagnosis model in Timor Leste using the smart eye camera (SEC) with Artificial Intelligence (AI)”. Peskiza ne’e halo iha Sentru Saude Postu Administrativu Venilale, Munisipiu Baucau.

Objetivu prinsipal hosi monitorizasaun ne’e atu observa direta peskiza sientítika no akompaña prosesu implementasaun tomak iha terenu hodi garante kualidade peskiza ne’e rasik.

Diretór Nasionál Katalogasaun Siénsia no Repózitoriu Sientífiku Dijitál INCT, nudar mos responsavel jeral ba projetu peskiza tinan 2025, Sr. Benvindo Guterres nia hateten katak prezensa INCT nian iha fatin sentru saude venilale ida ne’e hodi halo monitorizasaun liu husi observasaun direita ba projetu peskiza ne’ebe mak halao hela iha terenu hodi nune’e bele asegura kualidade peskiza tuir prosedimentu tékniku, metodolójiku nomos étika peskiza INCT nian.

Diretor ne’e mos hatutan tan katak peskiza husi Dra Lilia da C. Amaral Borges ho nia ekipa sira halo, oinsa atu utiliza Smart Eye Camera (SEC) hodi halo video no foto ba matan, nune’e bele hare moras husi matan no kontinua ho tratamentu ba matan, karik moras naton bele fo aimoruk no karik moras makas bele halo operasaun. Informasaun ne’ebe ami hetan katak Smart Eye Camera (SEC) ne’e diak no fasil los atu ita hodi ba ne’ebe det wainhira ita halo tratamentu ba moras matan.