Díli, 18 Marsu 2025 – Institutu Nasionál Siênsia no Teknolojia (INCT, sigla iha Português), halo asina akordu servisu hamutuk ho Ministério Desenvolvimento Rural e Habitação Comunitária (MDRHC) iha área formasaun peskiza. Seremonia lansamentu asina akordu ne’e realiza iha fatin edifisiu MDRHC, Caicoli, Dili.
Sekretaria Ezekutiva INCT, Dra. Maria Elsa Diogo Correia, iha nia intervensaun hateten katak, seremonia ida ne’e, hau hanoin importante teb-tebes ba Ministério Desenvolvimento Rural e Habitação Comunitária (MDRHC) hodi halo akordu ida ba koperasaun hamutuk ho ami Institutu Nasionál Siênsia no Teknolojia (INCT), liu-liu iha área formasaun ba peskiza. Hau hanoin ita-bot sira hatene INCT hanesan instituisaun públiku ida ne’ebe ho nia misaun prinsipal atu dezenvolve koñesimentu sientífiku liu husi halo estudus peskiza ho nia rezultadu atu halo rekomendasaun ba governu hodi hadia bem estar populasaun nian. Tanba ida ne’e, maka oportunidade ida ohin diak tebes mai ami hodi bele halo koperasaun ho MDRHC, nune’e ami sei buka atu bele matereliza akordu ida ohin liu-liu iha área formasaun ba peskiza ne’ebe sei kontribui ba dezenvolvimentu kapasidade koñesimentu básiku ba futurus formandus ne’ebe sei partisipa iha formasaun ne’e.
Sekretaria Ezekutiva INCT hatutan tan katak, INCT hahú husi 2019 to’o agora halo peskiza hamutuk 67 ona no rezultadu hotu ami submete ba Governu bazeia ba rekomendasaun ne’ebe hetan husi dadus peskiza sira ne’e no ami submete ba governu, atu nune’e governu ho ninia polítika rasik atu uja sai hanesan referensia ida ba formulasaun polítikas públikas ba interese bem estar Timor-Leste nian.
Partisipa iha seremonia ne’e, II Vise Presidente Konsellu Ezekutivu INCT, Dr. Augustu da Conceiçao Soares, Direitor Jeral Dezenvolviemtu Rural, Dr. Felipe Cardoso Vieira, Xefe Gabinete Ministério Dezenvolvimentu Rural no Habilitasaun Komunitaria, Sr. Leo da Costa Oliveira, Magnífiku Reitor, Diretores Jerais Nasionais e Xefe Departamentu no Funsionariu Tekniku INCT.