Díli, 15 Novembru 2024 – Institutu Nasionál Siênsia no Teknolojia (INCT, sigla iha Português), realiza semináriu sientífiku ba selebrasaun loron mundial siénsia ba paz no ba dezenvolvimentu iha ambito aprezentasaun rezultadu peskiza sientífiku INCT iha tinan fiskal 2024 ho tema “Promover a Ciência, Tecnologia e Inovação em Prol do Desenvolvimento Nacional de Timor-Leste”. Seremonia ne’e realiza iha salaun Delta Nova, Comoro, Dili.
Objetivu hosi semináriu sientífiku ne’e atu partilla informasaun rezultadu peskiza sientífiku INCT nian iha tinan fiskal 2024 hosi peskizador sira hodi halo aprezentasaun ba iha públiku iha área sira hanesan; Siénsia Sosiais no Umanas, Inovasaun no Teknolojia no Siénsia Ezata no Naturais. Alende ne’e, iha eventu refere INCT mos halo lansamentu ba Revista Siénsia no Teknolojia no Livru Mapa ba Siénsia inklui Manual Aprovasaun Étika no Téknika.
Presidente Konsellu Ezekutivu Dr. José Cornélio Guterres iha sorumutu ne’e nia hateten, ohin ita selebra loron siénsia ba paz no ba dezenvolvimentu, ita hotu hatene katak mundu hotu tau importansia ba siensia no liu-liu bele rekoñese impaktu fundamental siénsia, teknolojia no inovasaun iha ema hotu nia moris loron-loron nudar humanu no professional sira. Hau hanoin serimonia ida ne’e, realiza hodi bele konvida identidade sira hotu atu bele hanoin hamutuk atu dezenvolve siénsia teknolojia no inovasaun liu husi dezenvolve peskiza tantu peskiza puru nomos peskiza aplikada iha ita nia rain, tanba peskiza sira ne’e hanesan informasaun importante ida ba ita nia nai ulun sira hodi bele halo desizaun polítika ida diak. tan ne’e mak hau hanoin tempo ida ne’e hanesan reflesaun ida hodi bele konvida ita nia peskizador sira hodi mai aprezenta sira nia rezultadu peskiza.
Sua Excia. Ministru Ensinu Superior, Siênsia no Kultura (MESSK), Dr. José Honório da Costa Perreira Jerónimo iha nia intervensaun hateten loron mundial siénsia ba paz no dezenvolvimentu importante teb-tebes tanba siensia no teknolojia maka bele transforma dezenvolvimentu nasaun ninian, hau hakarak hato’o kongratula ba INCT hodi realiza seremonia ida ne’e iha tinan-tinan ba selebrasaun loron mundial siensia ba paz no dezenvolvimentu. Komemorasaun ida ne’e selebra iha mundo tomak importante tebes hodi promove siensia ba paz no dezenvolvimentu iha nasaun sira hotu. Iha oportunidade ne’e hau hakarak hato’o mos hau nia parabens no rekoñesimentu senseriu ba peskizador sira ne’ebe ohin aprezenta sira nia rezultadu peskiza, realizasaun peskiza sira ne’e laos det hanesan esforsu individual hosi peskizador ida-idak maibe mos kontribui importante atu hametin kapasidade sientífika iha timor-leste. Estudu sira ne’e bele sai nudar fundamental ida ba dezenvolvimentu husi koñesimnentu lokal ida ne’ebe forte liu, ne’ebe hato’o atu hasoru dezafiu nasional sira ho solusaun sira nebe’e bazeia ba evedensia. Hau hanoin peskiza importante teb-tebes liu liu ba profesor sira ita tenke fo kontribuisaun importante ba ita nia dezenvolvimentu nasional.
Alende ne’e, iha seremonia ne’e mos Sua Excia. Ministru Ensinu Superior, Siênsia no Kultura, Dr. José Honório da Costa Perreira Jerónimo halo lansamentu ba Revista Siénsia no Teknolojia no Livru Mapa ba Siénsia inklui Manual Aprovasaun Étika no Téknika.
Partisipa iha seremonia ne’e I no II Vise Presidente Konsellu Ezekutivu INCT, Dr. Valentim Ximenes no Dr. Augusto Soares, Diretur Jeral MESSK, Hernanio Viterbo da Costa Soares, Diretur Ezekutivu ANAAA, Dr. Nilton Paiva Mau, Diretur Ezekutivu TIC, Sr. Venancio Pinto, Reitor IPB, Dr. Acacio Cardoso Amaral, Reitor de Institutu São João Brito, Pe. Izaias Abilio Caldas, Reitor Universidade Católica Timorense, Pe. Frei Joel Casimiro, Estudante IOB, Estudante UNPAZ, Estudante ETC no Peskizadores sira.