Díli, 23 Outubro 2024 – Parlamentu Nasional Komisaun G, ne’ebe trata asuntu Edukasaun, Juventude, Kultura no Sidadania, Kuarta-Feira ne’e halo audensia públika ho Ministériu Ensinu Superior, Siénsia no Kultura (MESSK), Institutu Nasional Siénsia no Teknolojia (INCT), Ajénsia Nasional ba Avaliasaun, Akreditasaun Akadémika (ANAAA), Universidade Nasional Timor Lorosa’e no Instituto Politécnico Betano (IPB) ho objetivu aprezentasaun Relatório 3º Trimestre 2024 no Proposta Orsamento Geral Estado (OGE) 2025 iha sala enkontru Parlamentu Nasional.
Prezidente Konsellu Ezekutivu INCT, Dr. José Cornélio Guterres, iha ninia intervensaun informa katak, INCT hetan orsamentu ho total Dollar Amerikanu $720,105.00 ba programa rua, Funsionamentu Dezenvolvimentu Institusional no Edukasaun no Formasaun. Nune’e iha trimester datoluk ida ne’e, ba programa Funsionamentu no Dezenvolvimentu Institusional institutu ezekuta ona 85.20% no ba programa Edukasaun no Formasaun institutu ezekuta ona 66.24% nune’e ezekusaun ba atividades INCT nian husi prinsipiu do ano até outubru 2024 ezekuta ona 78.08%. Nune’e Presidente hatutan tan proposta orsamentu INCT ba tinan fiskal 2025 ho total orsamentu $664,769.00 nafatin fahe ba programa rua Ensino Superior no Funsionamentu no dezenvolvimentu Institusional.
Alende ne’e, Sua Excia. Ministru Ensinu Superior, Siênsia no Kultura (MESSK), Dr. José Honório da Costa Perreira Jerónimo aprezenta mos Mapa ba Siénsia Timor-Leste ba presidente no membru parlamentu komisaun G no entrega direitamente livru Mapa ba Siensia Timor-Leste ba Presidente Komisaun G, Sr. Armando dos Santos Lopes.
Audiênsia ne’e Marka presenza hosi Sua Excia. Ministru Ensinu Superior, Siênsia no Kultura (MESSK), Dr. José Honório da Costa Perreira Jerónimo, II Vise Presidente Konsellu Ezekutivu INCT, Dr. Augusto Soares, Diretor Ezekutivu ANAAA, Dr. Nilton Paiva, Reitor IPB, Dr. Acacio Cardoso Amaral, Vise Reitor UNTL, Dr. Samuel Venâncio de Sousa Freitas, membru parlamentu komisaun G, Chefe Departamentu Planeamentu INCT no Tekniku Finansas INCT.