Dili, 22 Outubru 2024 – Institutu Nasionál Siénsia no Teknolojia (INCT, sigla iha Português), realiza formasaun iha loron Kinta-Sexta, 17-18 Outubru 2024, kona-ba regras no prosedimentus hodi promove governasaun ne’ebé di’ak iha Administrasaun Públika. Formasaun ne’e halao iha salaun INCT, Balide.
Objetivu husi formasaun ne’e, Atu eleva no haforsa kapasidade no abilidade tékniku profissional rekursus umanus hodi nune’e bele servi públiku ho diak efisiensia no efikaz, Atu entidades ka orgauns autonomus sira bele partilla sira nia experiensia no koñesimentu konaba boas prátikas ne’ebe implementa iha instituisaun no Atu funsionarius INCT bele aprofunda sira nia koñesimentu no experiensia profissional liu-liu iha area jestaun administrasaun, planeamentu, rekursus humanus, gestaun finansas, aprovisionamentu no jestaun ba patrimoniu estadu.
Presidente Konsellu Ezekutivu INCT, Dr. José Cornélio Guterres iha nia intervensaun hateten ohin loron ita hetan oportunidade diak, tanba INCT bele hetan formasaun durante loron rua liu husi formador sira, husi Komisaun Funsaun Públika, Institutu Nasional Seguransa Sosial, Inspesaun Jeral Estadu no Komisaun Anti Korupasaun. Hahú hosi formador funsaun públika sei esplika kona-ba oinsa Prátika ba Rejime Lisensas no Faltas ba Funsionarius sira iha Administrasaun Públika, hosi parte Institutu Nasional Seguransa sei esplika kona-ba Sistema Seguransa Sosial no Prosesu deklarasaun Remunerasaun iha Timor-Leste, hosi parte Inspesaun Jeral Estadu sei esplika kona-ba Importansia Aplikasaun Kontrolu Internu Institusional no ikus liu hosi parte Komisaun Anti Korupsaun sei lori ita ba koñese oitoan kona-ba oinsa atu halo Prevensaun ba Korupsaun iha Institusaun nia laran. Alende ne’e prezidente INCT hatutan tan formasaun sira ne’e bele hanorin ita hatoman-an moris iha boa prátikas, moris tuir boa governasaun iha ita nia institusaun ida-idak, ita rasik dala ruma moris ho rutinidade ita ladun tuir regras sira, entaun husi formasaun ne’e bele fó hanoin ba ita, oinsa ita bele tuir norma sira ho di’ak.
Formador sira maka hanesan; Direitor Nasional Planeamentu Kuadru Pesoal Funsaun Públika, Sr. Francisco da Costa Pereira, Diretor SUIS, Sr. José Soares, Direitor DNSII, Sr. Marcos Sarmento no Adjunto Komisariu Prev. KAK, Sr. Rosario Salsinha Araujo.
Partisipa iha formasaun ne’e Komisariu KAK, Dr. Rui Pereira dos Santos, I Vise Konsellu Ezekutivu INCT, Dr. Valentim Ximenes, II Vise Presidente Konsellu Ezekutivu INCT, Dr. Augusto da C. Soares, Sekretaria Ezekutiva INCT, Dra. Maria Elsa Diogo Correia, Diretores Nasional INCT no Funsiornariu sira.