Díli, 27 Setembru 2024 – Instituto Nacional de Ciências e Tecnologia (INCT), Sexta-Feira ne’e, kontinua hala’o atividade semináriu prelimináriu ba loron ikus nian husi peskizador/a sira ne’ebé mak halo aprezentasaun iha salaun INCT, Balide, Díli ne’e mak Dra. Teresa Freita Belo kona-ba “Cultural Influences on Family Income and Expense Management in Timor-Leste (Study Case in Urban and rural Areas)” ho avaliador Azevedo L. da C. Marçal no Dr. Hélio Augusto da Costa Xavier Mauquei.
Iha aprezentasaun husi Dra. Teresa ne’e mos hetan komentáriu no sujestaun husi Secretáriu Assunto Sosiais husi Covalima Sr. Filomeno cardoso katak ekipa peskizador/a husi Dra. Teresa nian atu bele hakerek mos kona-ba Profil kada munisipiu, suku, postu, kaben sai, kaben tama no dialetu ho nune’e bele fasilita atu bele hatene identidade munisipiu ida-idak. Iha mos sujestaun husi jovem akadémiku husi Universidade da Paz, Sr. Joanito de Jesus Bragansa kona-ba utilizasaun metodolojia peskiza mix metode atu nune’e bele hatene kuantidade klaru hodi buka solusaun ba influensia kultura iha vida real liu-liu liga ba edukasaun. Tuir kedas aprezentasaun hosi Dr. Hélio Brites da Silva ho tema “Diving Development Strategy for Young Timorese Entrepreneurs”, ho avaliador Dr. Azevedo L. da C. Marçal no Dr. Hélio Augusto da Costa Xavier Mauquei.
Hafoin termina aprezentasaun iha parte dader nian, kontinua kedas aprezentasaun sesaun loraik nian hosi Me. Feliciana Maria Vaz “Exploring National Examination Quality Using Rasch Measurement Model and Revising Suggestion: A case Study of the National Examination of Mathematics Subject in the Three-Year Executive National Exams (2018/19,2020/21 e 2022/2023)” ho avaliador Dr. Gaspar Varela no Dr. Lino Verdial do Rosário.
Ikus liu, enseramentu semináriu prelimáriu peskiza sientífiku husi II Vise-Prezidente Asuntu Administrasaun Finansas INCT Dr. Augusto A. Soares, hato’o agradese ba partisipantes sira ne’ebé partisipa durante semináriu prelimináriu no enkoraja partisipantes sira liu-liu parte relevantes sira atu partisipa fó apoiu másimu liu tan ba peskizador sira iha semináriu prelimináriu tinan 2025 ne’ebé sei mai, liu husi ideia kreativu no inovativu hodi hasa’e kualidade peskiza ho nune’e bele dezenvolve nasaun Timor-Leste liu husi peskiza sientífiku.