Uatu-Carbau, 25 Jullu 2024 – Diretór Nasionál Katalogasaun Siénsia no Repózitoriu Sientífiku Dijitál INCT, Sr. Benvindo Guterres hamutuk ho ekipa halo monitorizasaun ba peskiza sientífika hosi investigador Prinsipal, Dr. Benjamin Hoffer Martins ho titulu peskiza “Modelação da Bacia Hidrográfica de Irabere para o Dimensionamento da Barragem de Aproveitamento do Recurso Hídrico”. Peskiza ne’e halo Iha Mota Irabere, Postu administrativu Uatu-carbau, Viqueque.
Objetivu prinsipal hosi monitorizasaun ne’e atu observa direta peskiza sientítika no akompaña prosesu implementasaun tomak iha terenu hodi garante kualidade peskiza ne’e rasik.
Diretór Nasionál Katalogasaun Siénsia no Repózitoriu Sientífiku Dijitál INCT, Sr. Benvindo Guterres nia hateten katak prezensa INCT iha fatin ne’e ho intensaun atu observa direita lalaok peskiza ne’ebé realiza hosi peskizadór sira.
Iha sorin seluk, peskizador prinsipal Dr. Benjamin Hoffer Martins hateten katak agradese ba INCT bele fo fiar mai ami hodi bele halo peskiza ida ne’e, ho kazu ida atu halo modelasaun ba bacia hidrográfica ho estudus preliminar ida iha mota irabere, ponte fronteira entre uatucarbau ho iliomar hodi dezenvolve barajem, ne’ebé mak bele fo utilidade maximu ba bee iha mota irabere refere, nune’e laos det agrikultura maibe turismu, industria bee moos karik iha futuru kompañia balun bele mai instala iha ne’e, alende ne’e bele mos prevene risku hosi kauza udan ben extremu, ne’ebé bele afeita ba área sira besik hosi ne’e. Peskizador prinsipal ne’e hatutan tan, dadus sira ne’ebé ami hetan antes ona, liu-liu dadus hosi satelit ho dokumentu balun ne’ebe mak iha, ami tenta halo estudu preliminar hosi ne’e ami mai atu kruza, rekolla detallu liu tan konaba korente bee nian hodi difini ninia caudal nomos modelasaun tereñu ho drone hodi bele hatene kondisaun topografi rai ne’e ho mos ambiente ne’ebe besik iha fatin ne’ebé mak atu halo barazen ba.
Peskiza ne’e hetan partisipasaun maximu hosi peskizdor prinsipal, Dr. Benjamin Hoffer Martins, Diretór Nasionál Katalogasaun Siénsia no Repózitoriu Sientífiku Dijitál INCT, Sr. Benvindo Guterres, Membru Peskizadores Sr. Alfredo Ferreira ho Sr. Justino da costa Soares, Estudante UNTL no ekipa tékniku hosi INCT.