Díli, 28 Setembru 2022 – Ekipa Júri ba Avaliasaun Rekrutamentu Vaga Ajente Administrasaun Públika (AAP) Institutu Nasional Siênsia no Teknolojia (INCT) realiza enkontru ho observador Komisaun Funsaun Públika (KFP) Sr. Manuel Doutel.
Enkontru ne’ebé hala’o iha sala enkontru Institutu ne’e ho objetivu hodi halo aprezentasaun ba relatóriu no halo aprovasaun lista kandidatu, aprovasaun ba formatu avaliasaun kurikular ka avaliasaun dokumentu ba aplikante sira nian no ikus liu, aprovasaun kalendariu rekrutamentu.
Iha intervensaun, Sekretária Ezekutiva INCT, Dra. Maria Elsa D. Correia agradese ba Observador hosi KFP hodi disponibiliza tempu mai INCT hodi hare prosesu rekrutamentu AAP.
Nune’e mos, II Vise-Prezidente Konsellu Ezekutivu INCT, Dr. Augusto da Conceição Soares, hanesan Prezidente Júri, informa enkontru ne’e hanesan kontinuasaun ba prosesu rekrutamentu bazeia ba despaixu hosi Prezidente Komisaun Funsaun Públika nian hodi la’o tuir regra no prosedimentu sira. Nia mos reforsa tan katak, maske INCT hanesan Instituisaun autónomu ida, maibé kompremete hodi envolve no koopera nafatin ho KFP iha prosesu hotu-hotu.