Dili, 23 Agusto 2023 – Prezidente Konsellu Ezekutivu Institutu Nasionál Siênsia no Teknolojia (INCT, sigla iha Português), Dr. José Cornélio Guterres, hamutuk ho I no II Vise-Prezidente Konsellu Ezekutivu INCT, Dr. Valentim Ximenes no Dr. Augusto Soares simu bainaka hosi kompañia Internasional Paragon Pacifica no Kompañia Sorgha Sorgum Sejahtera hosi Indonesia.
Enkontru ne’ebe hala’o iha sala instalasaun INCT ne’e ho objetivu atu aprezenta kona-ba sira nia servisu hanesan peskizador hosi Akademia peskiza China no Malaysia atu halo investimentu iha area agrikultura hanesan sorghum, cassava/aifarinha, hemp no tohu, no ikus liu atu estabelese kooperasaun ho INCT hodi promove peskiza ba produtu agrikola refere.
Diretor Compañia Paragom Pacifica Domisili iha Jakarta Indonesia, Sr. Yudianto Tri, hatete sira nia prezensa iha ne’e atu hasoru Prezidente no Vise-Prezidente INCT atu halo investimentu iha area agrikultura. Kompañia Internasional ne’e servisu hamutuk mos ho sentru peskiza agricultura hosi China no Malaysia hodi bele hatene lolos kualidade produtu sira ne’e hahu hosi kultivasaun, produsaun, kolleita no prosesu fabrikasaun hodi utiliza iha rai laran no bele exporta mos ba rai liur (estranjeiru). Diretor ne’e salienta tan katak investimentu ba produtu agrikultura (sorghum, cassava/aifarinha, hempno tohu) presiza rai luan 50.000 hektare. Atu termina, nia resalta tan katak Kompañia Internasional rua ne’e servisu hamutuk mos ho Caesium Laboratorium Academica Peskiza China no Sinolib hosi Malaysia.
Presidente Ezekutivu, Dr. José Cornélio Guterres iha nia intervensaun hatete, antes hahu planu presiza asina Memorandu Entendimentu (MoU) entre INCT no Managing Director Sinolib Holding Group no CEO Caesium Laboratorium nune’e bele hahu servisu, tanba hosi ne’e mak ita bele define kedas area prioridade sira ne’ebe hakarak dezenvolve. Entretantu, parte rua konkorda iha tempu badak sei asina MoU.
Partisipa iha enkontru ne’e, Peskizadora Dra. Brigida Correia, Chief Executive Officer (CEO), Dr. Manivanan Saman, Managing Director SNOLB Holding Group, Michael Soh, Diretora Compaia Sorgha Sorghum Sejahtera, Dr. Diana Pujiastuti no nia Secretaria Sra. Didja.