![](https://i0.wp.com/inct.gov.tl/wp-content/uploads/2023/07/IMG_7510.jpg?resize=819%2C546&ssl=1)
Turiscai, 17 Jullu 2023 – Diretor Nasional Siênsia Ezata no Siênsia Naturais, Institutu Nasionál Siênsia no Teknolojia (INCT), Gregorio Rangel, M.Sc. hamutuk ho ekipa halo monitorizasaun ba peskiza sientífika hosi Dra. Teresinha Albertina Soares kona-ba “Estudo do Desenvolvimento Curricular no Ensino Basico, Desafios e Solucoes”, iha Turiscai munisipiu Manufahi.
![](https://i0.wp.com/inct.gov.tl/wp-content/uploads/2023/07/IMG_7481.jpg?resize=819%2C546&ssl=1)
![](https://i0.wp.com/inct.gov.tl/wp-content/uploads/2023/07/IMG_7421.jpg?resize=819%2C546&ssl=1)
Objetivu prinsipal hosi monitorizasaun ne’e atu observa direta peskiza sientítika no akompaña prosesu implementasaun tomak iha terenu hodi garante kualidade peskiza ne’e rasik.
Wainhira halo sorumutu ho Dirétor Eskola Central Turiscai, diretor Nasional Sr. Gregorio Rangel, M.Sc. hatete ekipa INCT nia prezensa iha Eskola Baziku Filial (EBF) Manumera tanba peskizadór sira husi INCT hili EBF ne’e sai hanesan fatin peskiza hodi realiza peskiza sientifika iha tinan ne’e.
Nia esplika, INCT kada tinan fo biban ba peskizadór sira husi nivel Institutu Ensinu Superior hodi submete proposta peskiza no ikus mai, iha tinan ida ne’e, iha proposta peskiza sientifiku 12 mak pasa, inklui proposta peskiza ne’ebé lideradu hosi peskizadora Teresinha Albertinha Soares, PhD. Tan ne’e, prezensa ekipa INCT nian iha ne’e atu hala’o monitorizasaun hodi akompaña lalaok peskiza ne’e rasik.
Diretor ne’e mos salienta liu tan katak, peskiza sientifika nesesita tebes hodi identifika fenomena real Timor-Leste nian atu nune’e rekomenda ba politiku na’in sira hodi mai ho planu ne’ebé ligadu ho rezultadu peskiza atu nune’e responde ba nesesidade komunidade sira iha area remotas hanesan iha Manumera, nune’e mos ba fatin sira seluk iha Timor-Leste.
Isabelita da Silva Barreto hanesan membru peskizador hatete peskiza ida ne’e atu hare liu kona-ba nivel koñesimentu estudante sira ba disiplina prinsipal iha segundu hanesan prosesu aprendizazen iha sala laran ba sextu ano, fahe kestinariu ba professor primeiru no segundu siklu ne’ebe mak hanorin iha eskola EBF, halo teste disiplina lima (5) hanesan disiplina Matematika, Portugues, Tetun, Siénsia Natural no Siénsia Sosial, no halo intervista ba Direitor/Koordenador EBF.
Peskiza ne’e hetan partisipasaun hosi estudante sira no Diretor Jeral EBF, Adjuntu EBF no profesor sira iha eskola Ensinu Baziku Filial Manumera.