Díli, 3 Jullu 2023 – Estrutura Másimu Institutu Nasional Siênsia no Teknolojia (INCT, sigla iha Português), hamutuk ho funsionariu hotu simu atuál Ministru Edukasaun Superior, Siênsia no Kultura (MESSK), Dr. José Honório da Costa Pereira Geronimo, iha instalasaun MESSK.
Iha serimonia ne’e Ministru Ensinu Superior, Siênsia no Kultura sesante, Sr. Longuinhos dos Santos entrega ofisialmente relatóriu servisu ba atuál Ministru no introduz programa ne’ebé ezekuta ona nomos aprezenta Instituisaun ne’ebé tutela ba MESSK rasik.
Iha intervensaun, atuál Ministru Edukasaun Superior, Siênsia no Kultura (MESSK), Dr. José Honório da Costa Pereira Geronimo husu atu servisu makas no hatutan katak, nasaun ne’e presiza Timor oan hotu nia kontribuisaun no labele husik Timor oan ida iha kotuk. Nia mos husu atu funsionariu publiku no dirijente atu pratika buat ne’ebe los, tenke iha boa fé no husu mos atu kontinua programa ne’ebe mak iha ona hodi Ministeriu bele lao di’ak atu bele kontribui ba dezenvolvimentu nasional.
Partisipa iha serimonia ne’e atual Sekretariu Estadu Arte no Kultura (SEAK), Jorge Soares Cristovão, Diretor Ezekutivu ANAAA, Diretor Ezekutivu FDCH, Diretor Jeral, Diretor Nasional, Tékniku no Funsionariu sira.