Díli, 15 Dezembru 2022 – Institutu Nasionál Siênsia no Teknolojia (INCT, sigla iha Português), realiza seminariu sientífiku ba selebrasaun loron mundial siénsia ba paz no ba dezenvolvimentu iha ambito aprezentasaun rezultadu peskiza sientífiku INCT iha tinan fiskal 2022 iha salaun Katedral, Dili. Seminariu ne’e ho tema “Promover a Ciência, Tecnologia e Inovação em Prol do Desenvolvimento Nacional de Timor-Leste.
Objetivu husi seminariu ne’e atu partilla informasaun rezultadu peskiza sientífiku INCT nian husi peskizador/a nain neen (6) ba iha públiku liu husi aprezentasaun iha seminariu nasional ba área sira hanesan siénsia naturais, siénsia sosiais, teknolojia no inovasaun. Alende ne’e, iha seminariu ne’e mos INCT halo lansamentu ba livru ho titulu; “Plano Estrategico INCT 2022-2023”, “Relatório de Recomendação Política Timor-Leste”, “Revista da Ciência e Tecnologia de Timor-Leste”, “Manual de Investigação Científica” no “Buletin INCT”.
Seminariu ne’e abertura husi Presidente Konsellu Ezekutivu Dr. José Cornélio Guterres nia hateten iha kontextu Timor-Leste, governu Timor-Leste konsege hari’i INCT nudar institutu publiku ho nia misaun atu promove siensia, teknolojia no inovasaun iha Timor-Leste liu husi dezenvolve peskiza, publikasaun, inventariu, formasaun, avaliasaun no akreditasaun ba obras sientifiku sira. Iha implementasaun peskiza no dezenvolvimentu, INCT koopera ho 18 universidade sira iha Timor laran tomak hodi kondus peskiza ne’ebe foka ba area prioritaria 5 mak hanesan; 1) Inovasaun, teknolojia no infra-estrutura, 2) Edukasaun, siensia umana no inkluzaun sosial, 3) Saude no Bem-estar, 4) Ekonomia, Agrikultura, Industria no Turismu no 5) Meiu Ambiente, Bio-diversidade no mudansa klimatika.
Presidente Konsellu Ezekutivu ne’e haktuir tan katak INCT hahu fomenta fundus peskiza ba dosente investigador sira iha universidade publiku no privadu iha Timor laran tomak hahu iha 2019 ho 7 projetu peskiza, iha tinan 2021 ho 16 projetu peskiza no iha tinan 2022 ho12 projetu peskiza no iha tinan 2023 sei fornese tan. Rezultadu husi investigasaun sira ne’e atu kontribui ba dezenvolvimentu siensia ein partikular no dezenvolvimentu nasional ein jeral iha Timor-Leste.
Presidente Konsellu Ezekutivu ne’e, relata tan INCT mos sei lansa primeira revista sientifika nudar knar prinsipal ida husi INCT. Lansamentu revista sientifiku ne’e nudar rekezitu ida alende de rekezitu sira seluk hanesan depozitu legal atu bele aplika ba ISSN ba UNESCO iha Paris no Revista ne’e mos fo kbi’it liu tan ba INCT atu atribui ISSN no fo akreditasaun ba revista sientifiku sira iha Timor laran tomak.
Iha fatin hanesan Sua Excelensia Ministru Ensinu Superior, Siênsia no Kultura (MESSK) Dr. Longuinhos dos Santos, iha ninia intervensaun, Ha’u hakarak fó-parabéns ba INCT, ne’ebé hili nafatin tema “Promove Siénsia, Teknolojia no Inovasaun ba Dezenvolvimentu Nasionál Timor-Leste”.
Importante tebes atu reflete kona-ba tema ne’e, tanba ita hakarak siénsia hanesan dalan ida hodi realiza Objetivu sira ba Dezenvolvimentu Sustentável no kontribui, hanesan ezemplu, atu hadi’ak liután seguransa alimentár no hamenus moras sira iha ita-nia rain. Ne’e signifika katak, ita presiza dezenvolve investigasaun sientífika ne’ebé iha impaktu pozitivu hodi transforma realidade ita-nia país nian. Tanba razaun ne’e maka, INCT desidi lansa editál sira, ne’ebé fó inisiativa ba investigadór nasionál sira atu konkore, ho objetivu atu hetan rekursu públiku sira hodi halo peskiza ne’ebé aplika ba realidade rai-laran nian, no peskizadór sira bele iha koñesimentu kona-ba problema rai-laran no sira mós bele fó solusaun.
Aspetu seluk ne’ebé ha’u hakarak salienta tan mak, ho INCT ninia inisiativa ne’e, profesór universitáriu sira bele realiza atividade peskiza nian, ne’ebé permiti sira atu kumpri pilár tolu (3) ne’ebé estabelese iha kareira dosente.
Importante maka INCT la’ós mobiliza dosente sira de’it, hanesan pesoa-individuál, maibé mobiliza mós instituisaun universitária sira ka instituisaun seluk ne’ebé iha potensia ba siénsia.
Ida-ne’e halo instituisaun sira iha interese boot hodi dezenvolve investigasaun, no ne’e kontribui tebes ba INCT atu sai hanesan institusionalizasaun ba investigasaun.
Investigaun sientífika ne’ebé INCT apoia iha tinan-2022, iha foku prinsipál ba área sira tuir mai: (1) Inovasaun, Teknolojia no Infraestrutura; (2) Edukasaun, Siénsia Umana no Inkluzaun Sosiál; (3) Saúde no Beinstár; (4) Ekonomia, Agrikultura, Turizmu no Indústria; no (5) Meiu Ambiente, Biodiversidade no Asaun Klimátika.
Bainhira realiza ona investigasaun sira-ne’e, INCT asumi kompromisu hodi estimula no promove koñesimentu sientífiku no teknolojia ne’ebé avansadu iha Timor-Leste, tuir domíniu no área koñesimentu sira ne’ebé importante no prioritáriu. Ita hotu iha esperansa katak, rezultadu hosi investigasaun sira-ne’e bele kontribui atu promove di’ak liutan ita- nia populasaun ninia beinstár (moris-di’ak).
Agora ha’u hakarak felisita investigadór sira ne’ebé halo ona sira-nia investigasaun no ohin sira sei bá aprezenta rezultadu sira ne’e. Realizasaun ba pesikiza sira-ne’e maka sinál pozitivu atu kontribui ba fortalesimentu peskiza sientífika ne’ebé hala’o iha Timor-Leste.
Peskizador sira ne’ebe halao sira nia aprezentasaun peskiza maka hanesan; (1) Dr. Acacio Cardoso Amaral ho nia titulo peskiza “A prevalencia da lombriga de classe trematode fasciola spp nos bufalos em Timor-Leste”, (2) Dra. Yuliaty ho nia titulo peskiza “O efeito do adubo organico bovino e a distancia de cultivo para a produtividade do sorgo”, (3) Dra. Aderita T. dos Santos ho titulo peskiza “Estudo sobre inundacoes em Dili, (4) Dr. Edmundo Viegas ho nia titulo peskiza “Status of digital education infusion in higher educations: A case study of Timor-Leste”, (5) Dr. Aurelio Guterres ho nia titulu peskiza “Imigrações Ilegais nas Fronteiras Terrestres em Timor-Leste: Problemas Principais e Propostas de Soluções” no Dr. Hélio Brites ho nia titulo peskiza “Diversifikasaun produtu kafé lokál hodi hasa’e valór venda iha indústria”. Moderador iha aprezentasaun peskiza nee maka Dr. Samuel Venânciode Sousa Freitas no Dr. Apolinário Magno.
Partisipa iha semenirariu ne’e, Peskizador sira, Magnifiku Reitor sira, Liñas Ministeriais, Institusaun Autonomu, Konsellu Jeral, NGO, Dosente sira no Avaliadór Peskiza sira.