Dili, 20 Setembro 2022, Institutu Nasionál Siênsia no Teknolojia (INCT, sigla iha Português) realiza Semináriu Preliminár Peskiza Sientífika 2022, ho nia tema: “Promove Koñesimentu Sientífiku no Teknolójiku iha Timor-Leste”, iha salaun IAN MARTIN, Balide, Díli.
Objetivu husi semináriu preliminár ne’e atu peskizadores sira aprezenta sira nia rezultadu peskiza ne’ebe ezekuta ona hahu husi inisiu to’o elaborasaun rezultadu Preliminár nune’e peskizadores sira bele hetan sujestaun no rekomendasaun husi avaliadores no partisipantes sira hodi mellora diak liu tan rezultadu peskiza refere.
Prezidente Konsellu Ezekutivu INCT, Dr. José Cornélio Guterres iha nia intervensaun hateten iha sorumutu ida ohin ita halao aprezentasaun preliminár ba projetu peskiza sanulu resin rua (12) husi peskizador sira iha area Saude Animal, Agrikultura, Governu Elektróniku (E:Government), Estudu Imigrasaun, Edukasaun no Komersiu Eletroniku. Iha aprezentasaun preliminár ne’e atu hare fila fali konsistensia proposta, rezultadu peskiza provizoria no analiza sira nomos atu hetan ideas hodi hariku liu tan relatoriu hodi aprezenta iha Dia Mundial da Siensia, Publikasaun Jornal Nasional no Internasional no despositu iha repositoriu nasional.
Presidente Konsellu Ezekutivu ne’e informa tan, INCT halo koperasaun ho universidade sanulu resin ualu (18) no institutu akademiku iha Timor laran tomak atu halao peskiza, iha tinan 2022, INCT lansa 5 area tematicas, 12 liña peskizas no 24 estudus maibe sanulu resin rua (12) mak priense rekezitus peskiza. Benifisiu husi peskiza ne’e nudar referensia ba dezenvolvimentu akadémiku iha Timor-Leste, nune’e bele hamosu siensia foun nomos bele sai referensia ba formulasaun polítika publika ba dezenvolvimentu nasional.
Peskizador Dr. Acácio Cardoso Amaral iha nia intervensaun hateten, projetu peskiza sanulu resin rua (12) nebe’e mak INCT aprova inklui mos tópiku ami nian konaba “A prevalência de Lombriga da Classe Trematode Fasciola spp nos Búfalos em Timor-Leste”. Peskiza ne’e ami kobre munisipiu tolu (3) husi parte rejiaun ueste reprezenta husi munisipiu bobonaro, rejiaun sentral reprezenta husi munisipiu Manufahi no rejiaun leste reprezenta husi munisipiu Baucau. Kada munisipiu ami vizita suku rua (2) no total hamutuk suku nen (6), suku sira ne’e ami rekolla amostra atus hat walunulu resin nen (486), kada suku ami rekolla ualu nulu resin ida (81) feaces ou karau ten. Rezultadu husi feaces sira ami rekolla husi karau timur hamutuk pursentu sanulu resin hitu (17) mak lumbriga iha karau laran, ne’e signifika ita iha karau atus ida (100) karau sanulu resin hitu (17) maka iha lumbriga ne’e bele hadaet mos ba ema wainhira ita konsumu karau nia aten no toelha. Lumbringa bele hela iha modo sira hanesan kanku, agriaun nebe’e mak moris iha mota no natar sira ne’e, tanba lombriga nia tolun kuandu tama ba karakol depois nia dolar sai ba dut ga modo sira ne’e ita ema ka karau mak han ou hemu be sira ne’ebe kontamina ho lumbriga ita bele hetan daet husi lombringa.
Peskizador ne’e hatutan tan katak peskiza sira hanesan ne’e tenki kontinua nafatin obra diak ida ne’e ho topiku ida nebe diak liu tan kualidade liu tan no hau espera katak rezultadu peskiza sira ne’e ita nia politika nain sira bele utliza ba planu no programa governu nian.
Iha enseramentu, I Vise Presidente Konsellu Ezekutivu, Dr. Valentim Ximenes hateten, INCT hakarak ho orgulu hakarak agradese ba parseiru peskizador sira nune’e mos avaliadores sira ne’ebe mai ho pensamentu finu hodi bele ajuda no fo hanoin diak ba ita nia peskizador sira hodi bele hadia sira nia rezultadu preliminar ho diak. Loron 3 tomak ita hamutuk iha fatin ida ne’e, kada ekipa peskiza aprezenta sira nia rezultadu preliminar, ita hotu hatene ami INCT akompaña katak iha rezultadu ida ne’e seidauk kompletu katak, barak mos aprezenta seidauk tuir formatu ne’ebe INCT fo, portantu husi ami nia parte ami sei hari ekipa ida, hodi ajuda no akompaña peskizador sira hodi aruma imi nia rezultadu peskiza tuir strutura no format ne’ebe iha. Rekomendasaun ne’ebe mai husi ita nia avaliador sira simu ba hodi hadia atu rikeza no kompleta itabot sira nia traballu sientífiku. Ita hotu tenki konsiente katak rezultadu sientífiku ne’e la monu deit iha INCT, tanba projetu peskiza ne’ebé ita oferese orsamentu mai husi governu, entaun rezultadu ne’ebé iha sei rekomenda parsialmente ba institusaun hotu, entidades relevantes sira nune’e mos munisipiu sira. Rezultadu peskiza mos sei sai hanesan referensia formulasaun politika publikas ba orgaun soberania sira hanesan Parlamento Nacional, Governo liu-liu ba ministeiru relevante sira, nune’e mos sei to’o iha nivel munisipiu sira.
Peskizador/a sira ne’ebe aprezenta iha semináriu preliminar mak hanesan: Dr.Ir. Brigida Antónia Correia, M.Agri.,IPM, Doutor Acácio Cardoso Amaral, Doutor Hélio Brites da Silva, Doutor João Muni, Doutor Vicente Soares Faria, Doutora Carla Alexandre de J. da Costa, Dr. Lúcio Ximenes SE,MM, Dra Ir. Yuliaty M. Agr,M.Phi,I PM, Doutor Augusto da Costa, SS,M.Theo.,M.A.M.Pd, Doutor Edmundo Viegas no Dr. Nilton Diamantino Paiva Mau.
Avaliador/a sira ne’ebe avalia iha semináriu preliminar ne’e mak hanesan: Doutor Benjamim de Araújo e Côrte-Real, Doutor Francisco Martins, Doutor Fernando Hanjam, Doutor Hélio Araújo da Costa Xavier Mau Quei, Doutor Claudino Ninas Nabais, Doutor Nolasco da Costa, Doutor José Nélson Salsinha, Doutor Azevedo Lourenço da C. Marçal, Doutor Câncio Miguel Monteiro, Doutor Júnior Raimundo da Cruz, Doutor Carlito de Araújo Mali Code, Doutor Afonso de Almeida, Doutora Teresinha Soares no Dr. Graciano S. Gomes.
Semináriu preliminar ne’e realiza durante loron tolu (3) no partisipa husi Peskizador sira, Diretor Sentru Peskiza, Reitores sira, Liñas Ministeriais, Avaliadór Peskiza, Key Expert no Estudante sira.