Díli, 3 Agusto 2022 – Estrutura INCT simu audiênsia hosi ekipa Gabinete Primeiro Ministro (GPM), Sr. José Barros Leong, Sr. Kerytilo Pinto no Sra. Geovania Guterres Ornai ho objetivu atu diskute konaba servisu hamutuk entre Gabinete Primeiro Ministro no INCT iha area peskiza ligadu ho programa Cadeia de Valor, iha sala enkontru INCT, Balide.
Koordenador Unidade Akompañamentu Cadeia de Valor (UACV) Sr. José Barros Leong iha nia intervensaun hateten ami nia prejensa iha ne’e atu partilla informasaun konaba ba ligasaun servisu papel INCT nian iha area peskiza, nune’e GPM iha programa ida ho naran programa Cadeia de Valor ho nia intensaun atu enkoraza produsaun rai laran no redus importasaun hosi rai liur. Entaun hosi programa cadeia de valor ne’e ita atu hare tok saida mak ita bele fo apoiu ba produsaun aihan iha rai laran, nune’e ami hakarak halo liña koordenasaun ho ministeriu sira ne’ebe relevante hanesan Ministeriu Agrikultura no Peskas (MAP) toma konta ba produsaun aihan iha rai laran no inklui mos Ministeriu Turismu, Komersiu e Industria (MTCI) liliu hare ba parte industria nian. Entaun hosi buat hirak ne’e ami persija apoiu hosi INCT liu-liu informasaun ka dadus ruma liga ho peskiza nebe’e parseiru sira halo ona hanesan area produsaun alimentar, kuda hare ga modo ou produsaun hanesan manutolun no seluk tan.
Sr. Kerytilo Pinto responsavel ba area peskiza GPM hatutan tan objetivu ami nain tolu mai iha ne’e atu halao diskusaun regular ida ho INCT karik bele tau hanesan Mou ida entre INCT ho GPM para atu hare komponente peskiza ida ne’e bele kontribui iha nivel dezenvolvimentu seitor privadu, dezenvolvimentu sistema merkadu iha timor ne’e lao to’o iha faze ida ne’ebe. Entaun saida mak ami hanoin agora oinsa mak INCT ho GPM bele hanoin tok planu integradu ida kada tinan- tinan aloka orsamentu, oinsa mak ida ne’e ba tinan oin konsiderasaun ba dezenvolvimentu programa Cadeira de Valor no dezenvolvimentu sistema merkadu ida ne’e ita bele integra topiku ka materia sira ne’e bele hola parte intergradu iha ita nia kolaborasaun ne’ebe maka bele kontribui ba iha reforma jestaun finansas publiku ga reforma iha ekonomia diversiu iha timor-leste ninian.
Presidente Konsellu Ezekutivu INCT, Dr. José Cornélio Guterres iha nia intervensaun hateten INCT ne’e hanesan institusaun publiku ida ho nia misaun prinsipal atu promove siênsia teknolojia no inovasaun iha Timor-Leste, liu hosi peskiza puru no aplikada. INCT halo ona peskiza hahu hosi 2018 nee produs peskiza rua, depois iha 2019 ita produs tan peskiza hitu, tinan 2020 ita lakonsege produs peskiza tanba laiha orsamentu, maibe iha 2021 ita kontinua fali produs peskiza sanulu resin neen no tinan 2022 peskiza lao hela hamutuk sanulu resin rua peskiza. Peskiza sira nee bazeia area tematika hanesan a) Inovasaun, Teknolojia no Infrastrutura, b) Edukasaun, Formasaun no Inkluzaun Sosial, c) Ekonomia, Agrikultura, Turismu no Industria, d) Saude no Bem-Estar, no e) Meiu Ambiente, Biodiversidade no Alterasoens Klimatikas.
Presidente INCT hatutan konaba dadus sira ne’e ami iha hosi peskiza sira ne’ebe halo ona, maibe wainhira ita fornese dadus tenki bazeia mos ba objetivu espesifikus no ita bele review dadus sira ne’ebe iha ona ou bele mos ita halo peskiza foun karik peskiza anterior seidauk bele kobre ida ne’e mak hau hanoin ita bele servisu hamutuk liu hosi asina momerandu ida.
Iha enkontru ne’e partisipa mos hosi II Vise Presidente INCT, Dr. Augustu Soares, Sekretaria Ezektutiva INCT, Dra. Maria Elsa Diogo Correia no Ofisial Peskiza GPM, Sra. Geovania Guterres Ornai.