Díli, 17 Maiu 2022 – II Vise Prezidente Konsellu Ezekutivu Institutu Nasionál Siênsia no Teknolojia (INCT), Dr. Augusto Soares, hamutuk Xefe Divizaun Planeamentu INCT, Sr. Calistro Maria Correia, partisipa iha enkontru Trimestral Daruak ba Ajênsia Autonomu Asuntu Sosial sira ho objetivu hodi aprezenta planu ezekusaun ne’ebé implementa ona iha trimestre dahuluk no halo mos aprezentasaun planu trimestre daruak nian ba Sua Excelênsia Vise-Primeira Ministra no Ministra Soliedariedade Sosial no Inkluzaun, Sra. Armanda Berta. Enkontru ne’e prezide hosi Vise-Primeira Ministra iha salaun enkontru VPM-MSSI, kaikoli.
Iha enkontru ne’e Vise-Prezidente Konsellu Ezekutivu INCT, Dr. Augusto Soares aprezenta estrutura programatika tinan fiskal 2022 INCT nian, rezultadu ezekusaun trimestre dahuluk no kronograma atividade trimestre daruak. Programa ne’ebé importante iha Instituisaun ida ne’e mak boa governasaun no jestaun institusional no programa edukasaun no formasaun.
Partisipa iha enkontru ne’e institusaun autonomu sira hanesan UNTL, FDCH, IPB, ANAAA, Diretor jerál sira no tékniku hosi gabinete Vise-Primeira Ministra.