Díli, 26 Maiu 2022 – Institutu Nasionál Siênsia no Teknolojia (INCT, sigla iha Português), halo sorumutu ho estajiáriu sira no Dosente hosi Universidade da Paz (UNPAZ) hodi halo enseramentu ba estajiária Nelia Maria da Costa Ximenes Ribeiro, Efizenia Casmira Barros no Jenedio Frederico Pereira. Sorumutu ne’e prezide hosi II Vise-Prezidente Konsellu Ezekutivu INCT, Dr. Augusto Soares, iha sala enkontru INCT, Balide.
II Vise-Prezidente Konsellu Ezekutivu INCT, Dr. Augusto Soares, iha nia intervensaun hatete, lori INCT nia naran agradese ba estajiáriu sira ne’ebé durante fulan ida estajiu iha institutu ne’e. Ami espera katak imi bele aproveita ho di’ak no manan esperiênsia iha área administrasaun, aprovizionamentu no finansas.
Dosente Paulo Victor Caldas Soares, hateten lori Universidade da Paz hato’o agradesimentu tebes ba INCT bele simu ona ami nia estudante sira no fasilita sira hodi hala’o sira nia estajiu durante fulan ida iha institutu ne’e, maske ho tempu ne’ebé limitadu tebes, maibé tenke tuir kalendáriu universidade nian.
Efizenia Casmira Barros, nu’udar reprezentante, hato’o agradesementu ba Presidente no estrutura tamba durante ne’e bele aprende no prátika saida mak aprende iha universidade.
Partisipa iha sorumutu ne’e, Xefe Divizaun Sr. Benjamin Cabeças, Sra. Maria Jose A. da Costa Gonçalves no Sra. Suzana Maria Delfina dos Santos.