Díli, 28 Abril 2022 – Institutu Nasionál Siênsia no Teknolojia (INCT, sigla iha Português) hala’o sorumutu ho Jurista Instituto Nasional Seguransa Sosial (INSS), Sr. Zeferino da Costa Bobo, ho objetivu hodi esklarese ba funsionáriu INCT sira, relativamente rejime INSS. Aprezenta lei numeru 12/2016, relativu rejime kontributiva Seguransa Sosial mai Dirijente no Funsionariu INCT tomak.
II Vise-Presidente Konsellu Ezekutivu INCT, Dr. Augusto Soares, iha nia intervensaun, refere katak, ho prezensa hosi Sr. Zeferino da Costa Bobo, bele esklarese preokupasaun funsionáriu sira nian, tanba kada fulan sempre ko’a saláriu funsionáriu sira nian tuir lei ne’ebé estabelese ona.
Tékniku INSS, Sr. Zeferino da Costa Bobo, informa katak, obstakulu INCT nian mak seidauk prienxe formuláriu inskrisaun ba traballador no seidauk rejistu INCT nu’udar entidade empregadoa iha sistema seguransa sosial. Ho nune’e, rekomenda atu Institutu rejista iha INSS hodi hetan direito ne’ebé iha. Mensiona benefisiu ne’ebé sei hetan iha lei ida ne’e hanesan subsidiu maternidade, subsidiu paternidade, Adosaun, Risku klinika durante isin rua, interupsaun gravidez ka abortu no subsidiu mate/reembolsu despeza funeral no pensaun sobrevivensia, pensaun invalidez absoluta no pensaun invalidez relativa no pensaun vellise.
Partisipa husi sorumutu ne’e Sekretaria Ezekutiva INCT, Dra. Maria Elsa Diogo Correia, Xefe Departamentu, Xefe Divizasaun no funsionariu sira hotu.