Díli, 24 Marsu 2022 – Iha reprezentasaun Sua Excia. Ministru Ensinu Superiór, Siénsia no Kultura (MESSK) Timor-Leste, Prezidente Konsellu Ezekutivu INCT, Dr. José Cornélio Guterres, partisipa iha seremonia abertura Tinan Akadémiku 2022 Universidade Católica Timorense (UCT) São João Paulo II, iha salaun Nobel da Paz, Balide.
Prezidente afirma katak, ohin nu’udar momentu istóriku ida ba Universidade Katolika iha Timor-Leste. Universidade ida ne’ebé bele marka diferensa hosi Universidade sira seluk, signifika katak la’os de’it oferese kursu foun maibe bele oferese kondisaun di’ak liu hodi inova prosesu no aprendizajen nomós investigasaun.
Hodi Sua Excia. Ministru Ensinu Superior, Siênsia no Kultura (MESSK), Doutor José Cornélio Guterres subliña katak papel dosente ne’e vital atu konkista ensinu ida ho kualidade no aprendizajen ensinu superior. Iha sentidu ida ne’e, Prezidente enkoraja dosente universitariu atu aposta iha kualidade prosesu ensinu aprendizajen, hanesan mos dezenvolvimentu investigasaun akadémika no sientífika, tanba liu-hosi investigasaun ita bele hamosu siênsia no inova teknolojikamente, situasaun ne’ebé sei posibilita fornese dadus kredível ba governante sira hodi formula polítika públika ba dezenvolvimentu nasionál.
Partisipa iha seremonia ne’e Reprezentante da Santa Sé em Timor-Leste, Rev.ma Monsenhor Marco Sprizzi, Premiadu Nobel da Paz, Dr. Jose Ramos Horta, Dom Virgilio do Carmo da Silva, SDB, Embaixador Republika Indonésia iha Timor-Leste, Dr. Okto Dorinus Manik, Reitor UCT, Pe. Joel Casamiro Pinto OFM, Direitor Ezekutivu ANAAA, Dr. Edmundo Viegas, Reitor Universidade Publiku no Privada no Estudante sira.